काठमाडौं (हाम्रो खेलकुद) –गोर्खा व्बाइज क्लब रुपन्देही नेपाल आइस चौथो सिन्धु कप फुटबल प्रतियोगिताको फाइनलमा पुगेको छ ।

सिन्धुपाल्चोक लामोसाँघु स्थित बसन्तपुर मैदानमा बुधबार भएको पहिलो सेमिफाइनल खेलमा विभागीय एपिएफलाई पेनाल्टी सुटआउटमा ४ – ३ ले पराजित गर्याे । बुधबार नै नारायणघाटमा जारी भरतपुर गोल्डकपमा एपिएफ क्वार्टरफाइनल पुगेको छ ।

सिन्धु गोल्डकपको फाइनलमा गोर्खा ब्वाइजले आयोजक युथ स्पोर्टस् क्लब र जावलाखेल युथ क्लबको विजेतासँग खेल्नेछ । बुधबारको पहिलो सेमिफाइनलको निर्धारित समय गोलरहित बराबरीमा टुंगिएको थियो ।

त्यसपछिको पेनाल्टी सुट आउटमा गोर्खा ब्वाइजले बाजी मार्यो । गोर्खा ब्वाइजका लागि रुपेश के सी, उत्तम गुरुङ, भरत शाह र सकल रेग्मीले गोल गरे । एपिएफको लागि राम कुमार कुमाल, हरी कार्की र प्रदिप लामाले गोल गरे । एपिएफका रवि थिंक र गोलरक्षक अमृत चौधरी चुके ।

दुवै टोलीले गोलका लागि केहि अवसर पाएपनि सफल भएनन् । खेलको आठौं मिनेटमा रुपन्देहीका शुसिल यादवको उत्कृष्ट प्रहार क्रसबार माथिबाट बाहिरियो । ४१ औं मिनेटमा मिनेटमा रुपन्देहीका रुपेशले पेनाल्टी बक्स बाहिरबाट प्रहार गेरेको बल क्रसबारमा लागेर फर्किएको थियो ।

एपिएफका रविले ३१ औं मिनेटमा प्रहार गरेको फ्रिकिक क्रसबार माथिबाट बाहिरिएको थियो । गोर्खा ब्वाइजका रुपेश म्यान अफ दी म्याच घोषित भए र उनले ५ हजार रुपैयाँ प्राप्त गरे ।
आयोजक र जावालखेलबीच दोस्रो सेमिफाइनल बिहीबार हुनेछ । प्रतियोगिताको विजेताले ५ लाख र उपविजेता टिमले २ लाख ५० हजार प्राप्त गर्नेछ ।