एजेन्सी – स्पेनिस महारथी रियल म्याड्रिडले फ्रान्स तथा पेरिस सेन्ट जर्मेन (पीएसजी)का युवा फरवार्ड केलियन एमबाप्पेलाई विश्व कीर्तिमानी २४० मिलियन पाउन्डको प्रस्ताव गर्ने तयारी गरेको छ ।

खराब सिजनबाट गुज्रिरहेको रियल अहिल टिम निर्माणमा जुटेको छ । समर ट्रान्सफर विन्डोमा रियलले खेलाडी अनुबन्धमा मोटो रकम खर्चने पक्का छ । जसमा रियलले चेल्सी तथा बेल्जियन फरवार्ड इडेन हजार्ड, फ्रान्सका पल पोग्वासँगै एमबाप्पे अनुबन्धन गर्ने तयारी गरेको छ । यदि एमबाप्पेलाई रियलले २४० मिलियन पाउन्डको प्रस्ताव राख्ने तयारी गरेको छ । जुन सफल भएमा विश्वको सर्वाधिक महँगा खेलाडी बन्नेछन् । ब्राजिल तथा पीएसजीका अर्का फरवार्ड नेयमार २२२ मिलियन पाउन्डसहित सर्वाधिक महँगा खेलाडी हुन् ।

रियलका प्रशिक्षक जिनेदिन जिदानले टिम निर्माणमा अब कुनै गोप्यता नरहने बताएका छन् । फ्रान्स फुटबलका अनुसार रियलले यो समरमा हजार्ड, त्यसपछि पल पोग्वा र एमबाप्पेलाई अनुबन्ध गर्ने प्रयास थाल्ने बुझिएको छ । फ्रान्स फुटबलका अनुसार २० वर्षीय एमबाप्पेको मुल्य २०१७ पछि आकासिएको हो । हजार्ड, पोग्वा र एमबाप्पेलाई ग्यारेथ बेल, हामेस रोड्रिग्वेज, इस्को र करिम बेन्जेमाको विकल्पको रुपमा हेरिएको छ ।

एमबाप्पेले फ्रान्सलाई विश्वकप जिताउन महत्वपुर्ण भुमिका निभाएका  थिए । उनले फ्रान्स तथा पीएसजीका लागि ९४ गोल गरिसकेका छन् । एमबाप्पेले यो सिजन लिग वानमा पीएसजीका लागि ३० गोल गरेका छन् ।