लामोसाँघु (हाम्रो खेलकुद) – आठौं राष्ट्रिय खेलकुदको स्वर्ण पदक विजेता त्रिभुवन आर्मी क्लब चौथो सिन्धु कप फुटबल प्रतियोगिताको क्वार्टरफाइनलमा स्तब्ध भएको छ ।

सिन्धुपाल्चोक लामोसाघु स्थित बसन्तपुर मैदानमा मंगलबार भएको अन्तिम क्वार्टरफाइनलमा आयोजक युथ स्पोर्टस् क्लबसँग २ – १ ले पराजित हुँदै आर्मी प्रतियोगिताबाट बाहिरिएको छ ।
आयोजक टोलीको जितमा सुग्रित मगर र सुरेश खत्रीले गोल गरे । आर्मीका लागि कप्तान राजिव गुरुङले गरेका थिए ।

खेलको २२ औं मिनेटमा सुग्रितले गोल गर्दै आयोजकलाई अघि बढाए । पेनाल्टी बक्स बाहिरबाट उनले प्रहार गरेको बल सिधै गोलमा परिणत भएको थियो । दोस्रो हाफको ११ मिनेटमा राजिवले गोल गर्दै आर्मीलाई खेलमा फर्काए । उनले विवेक बस्नेतको पासमा गोल गरेका थिए ।

तर, त्यो बराबरी लामो समय टिकेन । ६० औं मिनेटमा सुरेशले गोल गरे । सुग्रितको प्रहारमा आर्मीका गोलरक्षक गान्दिभ खड्काबाट रिबाउन्ड भएपनि सुरेशले त्यसमै गोल गेका हुने । आयोजक टोलीका आशिष श्रेष्ठ म्यान अफ दी म्याच घोषित भए र उनले ५ हजार रुपैयाँ प्राप्त गरे ।

प्रतियोगितामा बुधबार विभागिय टोली एपीएफ र गोर्खा ब्वाइज क्लब रुपन्देहीबीच प्रतिस्पर्धा हुनेछ । प्रतियोगिताको विजेताले ५ लाख र उपविजेता टोलीले २ लाख ५० हजार रुपैयाँ प्राप्त गर्नेछ ।