काठमाडौं (हाम्रो खेलकुद) – नेपाली महिला राष्ट्रिय फुटबल टोलीकी फरवार्ड सावित्रा भण्डारीले सोमबार इन्डियन वुमन्स लिगमा डेब्यु गरिन् । सेथु फुटबल क्लबको लागि खेल्दै सावित्राले पहिलो खेलमा नै ४ गोल गर्दै उत्कृष्ट सुरुवात दिलाइन् ।

मणिपुर पुलिस स्पोर्ट्स क्लबविरुद्ध लिगको पहिलो खेलमा सेथुले ६-४ को जित दर्ता गर्दा सावित्रा प्लेयर अफ द म्याच घोषित भइन् । खेलको २९ सेकेन्डमै गोलको खाता खोल्न सफल सावित्राले पहिलो हाफमा नै ४ गोल गरेकी थिइन् । उनले अर्को गोलमा असिस्ट गर्दै टोलीको जितमा महत्त्वपूर्ण भूमिका निर्वाह गरिन् ।

सावित्राले डेब्यु खेलमा नै प्लेयर अफ द म्याच पाउँदा खुसी व्यक्त गरिन् । ‘ पहिलो खेलमा नै प्लेयर अफ द म्याच भएँ । हाम्रो लक्ष्य केहि खेल जित्ने नभएर उपाधि नै जित्ने रहेको छ । अहिलेको प्रदर्शनले भविष्यमा पनि राम्रो छाप छोड्नेछु,’ उनले बताइन् । सावित्राले भारतको लिग नेपालको तुलनामा व्यवस्थित रहेको र अन्तर्राष्ट्रिय म्याच खेलेजस्तो वातावरण हुने आभास गरेको बताइन् ।

लिगको व्यवस्थापन उपल्लो स्तर देखिएपनि खेलाडीमा भने उनले खासै भिन्नता पाएकी छैनन् । ‘हामीले नियमित रुपमा भारतको राष्ट्रिय टोलीसँग नै खेल्दै आएका छौं । नेपालका खेलाडीले पनि यहाँ सहज रुपमा खेल्ने सक्ने देखेको छु । हामीले भारतका खेलाडी कसरि खेल्छन भन्ने नजिकबाट नियालेको कारण पनि थप सहज हुन्छ,’ उनले प्रष्ट पारिन् ।

सावित्राको टोली सेथु हाल लिग अन्तर्गत दोस्रो समूहको शीर्षस्थानमा छ । टोलीले लिगअन्तर्गत बुधबार हुने खेलमा बेंगलोर युनाइटेड फुटबल क्लबको सामना गर्दैछ ।