काठमाडौं (हाम्रो खेलकुद) – नेपाली राष्ट्रिय पुरुष फुटबल टिमले दुई मैत्रीपुर्ण फुटबल खेल्ने पक्का भएको छ ।

आसन्न विश्वकप छनोटको तयारीको लागि नेपालले मलेसिया र चाइनिज ताइपेइसँग दुई मैत्रीपुर्ण खेल खेल्न लागेको नेपाली फुटबलको सर्वाेच्च संस्था अखिल नेपाल फुटबल संघ (एन्फा) ले हाम्रो खेलकुदलाई जानकारी गराए ।

नेपालले यसअघि नै चाइनिज ताइपेईसँग जुन ६ मा खेल्ने पक्का गरेपनि मलेसियासँगको मैत्रीपुर्ण खेल मंगलबार मात्र तय भएको एन्फाले जनाएको छ । मलेसियासँगको यसअघिको एक मैत्रीपुर्ण खेल रद्ध भएको थियो ।

मलेसियाले नेपालसँग खेल्नु अघि नै अर्काे मैत्रीपुर्ण खेल खेलेका कारण फिफाले मान्याता नदिदा मलेसिया र नेपालबीचको खेल रद्ध हुन पुगेको थियो ।

सोही रद्ध भएको खेललाई निरन्तरता दिन मलेसिया फुटबल एसोसिएसनले एन्फालाई पुनः खेलको लागि अनुरोध गरेको थियो ।

मलेसियासँगको मैत्रीपुर्ण खेल रद्ध भएपछि नेपालले कुवेतसँग दुई मैत्रीपुर्ण खेल खेलेको थियो । जसमा नेपालले एक बराबरी र एक हारको सामना गरेको थियो ।

जस अनुसार नेपालले जुन २ मा मलेसियाको क्वालालम्पुरमा घरेलु टोलीसँग प्रतिस्पर्धा गर्नेछ । जुन ६ मा नेपालले ताइवानमा चाइनिज ताइपेईसँग प्रतिसपर्धा गर्नेछ ।

सोही मैत्रीपुर्ण खेल र विश्वकप छनोटको दोस्रो चरणको खेलको लागि नेपालले आजबाट प्रशिक्षण सुरु गरेको छ । नेपाली टोलीको मुख्य प्रशिक्षकमा स्वीडिस योहान कालिन रहेका छन् ।

कालिन प्रशिक्षक बनेर आएपछि नेपालले दोस्रोपटक मैत्रीपुर्ण खेल खेल्न लागेको हो । यसअघि नेपालले कुवेतसँग दुई मैत्रीपुर्ण खेल खेलेको थियो ।