एजेन्सी – लिभरपुलका फरवार्डद्वय मोहमद सलाह र रोबर्टो फिर्मिनोले मंगलबार हुने च्याम्पियन्स लिगअन्तर्गत सेमिफाइनल चरणको दोस्रो लेग चोटका कारण गुमाउने भएका छन् ।

सलाहले शनिबार इंग्लिस प्रिमियर लिग अन्तर्गत न्युकासलविरुद्ध खेलमा गोलरक्षक मार्टिन दुब्राभ्कासँग जुध्दा चोट बोकेका थिए । टाउकोमा चोट बोकेका सलाहलाई स्ट्रेचरमा राखेर मैदानबाहिर लागिएको थियो । प्रशिक्षक योर्गेन क्लोपले सोमबार पत्रकार सम्मेलनमा बोल्दै सलाहले बार्सिलोनाविरुद्ध खेल्न नसक्ने स्पष्ट पारेका छन् ।

अर्का फरवार्ड फिर्मिनोले भने चोटका कारण न्युकासलविरुद्ध खेल पनि गुमाएका थिए । ‘ हामीले विश्वका उत्कृष्ट मध्यका दुई फरवार्डको साथ गुमाएका छौं । र हामीले ४ गोल गर्नुछ,’ क्लोपले भने, ‘ खेल पक्कैपनि सहज हुने छैन । तर हामी यस सिजनको च्याम्पियन्स लिगलाई उचित रुपमा अन्त्य गर्न पुरै ९० मिनेट आफ्नो सक्दो प्रयास गर्नेछौं ।’

यता बार्सिलोनाले भने लिभरपुलका दुई खेलाडी खेल्न नसक्ने भएपछि सहानुभूति प्रकट गर्दै ट्वीट गरेको छ । ‘ यो स्तरको खेल विश्व स्तरीय खेलाडीको लागि हुने गर्छ । शीघ्र स्वास्थ्य लाभको कामना ।’ बार्सिलोनाको ट्वीटमा लेखिएको छ ।

जारि सिजन लिभरपुलका लागि सलाहले २६ गोल तथा फिर्मिनोले १६ गोल गरेका छन् । सलाह र फिर्मिनोसँगै मिडफिल्डर नाबी केइटा पनि चोटका कारण बार्सिलोनाविरुद्ध खेल्ने छैनन् । लिभरपुलले लगातार खेलाडी चोटका कारण गुमाउँदा बार्सिलोनाले भने लिग खेलमा ११ खेलाडीलाई विश्राम दिएको थियो ।