एजेन्सी – फ्रान्सेली मिडफिल्डर फ्रान्क रिबेरीले बायर्न म्युनिख छाड्ने भएका छन् । ३६ वर्षीय रिवेरीको यो सिजनसँगै बायर्नमा सम्झौता सकिँदैछ । उनले सम्झौता नवीकरण नगर्ने मनसायल बनाउदै क्लब छाड्ने घोषणा गरेका हुन् ।

१२ वर्ष बायर्नमा बिताएका रिबेरीले विभिन्न २१ उपाधि जित्न सफल भएका थिए । जसमा ८ बुन्डेस लिगा, १ च्याम्पियन्स लिग र अन्य उपाधिहरु रहेका छन् । बायर्नले सन् २०१२-१३ को सिजनमा च्याम्पियन्स लिग जितेको थियो । उनले त्यसबेला लियोनेल मेस्सी र क्रिस्टियानो रोनाल्डोलाई पछाडी पार्दै युरोपको उत्कृष्ट खेलाडीको अवार्ड जितेका थिए ।

बायर्नमा १२ वर्ष रहँदा रिबेरीले ४२२ खेलमा १२३ गोल गरेका छन् । रिवेरी सन् २००७ मा फ्रेन्च क्लब मार्सेलीबाट बायर्न पुगेका थिए । यो सिजन चोटसँग जुधेका रिबेरीले शनिबार राति ह्यानोभरमाथि ३–१ को जित निकालेको खेलबाट टिममा पुनरागमन गरेका थिए ।

३६ वर्षीय रिबेरीले क्लबको वेबसाइटमा बायर्न आएर आफुले ठुलो सफलता हात पारेको बताएका छन् । ‘गुडवाई भन्नु पक्कै सहज छैन । तर, भन्नैपर्ने हुन्छ । हामीले टिममा रहेर २० भन्दा बढी उपाधि जितेका छौं । मैले यहाँ पाएको सफलतालाई कहिल्यै बिर्सने छैन,’ रिबेरीले भनेका छन् ।

रिबेरीसँगै अर्काे लेजेन्ड आर्जेन रोवेनले पनि यसै सिजन बायर्न छाड्दैछन् । यी दुईको जोडीले बायर्नमा एक दशक तहल्का मच्चाएका थिए । बायर्नका अध्यक्ष कार्ल हेन्ज रुमेनेजीले रिवेरी र रोवेन उत्कृष्ट खेलाडी रहेको बताएका छन् । ‘साँच्चै रिबेरी र रोवेन उत्कृष्ट खेलाडी हुन् । उनीहरुले पछिल्लो एक दशक बायर्नलाई अर्कै उचाईमा पुर्याएका थिए । हामी दुवै उत्कृष्ट खेलाडीलाई सुखद बिदाई गर्नेछौं,’ अध्यक्ष हेन्जले भने ।

बायर्न यो सिजनको पनि बुन्डेस लिगाको उपाधिनजिक छ । बार्यनले अब आरबी लाइपजिग र फ्रान्कफर्टसँग खेल्न बाँकी छ ।