एजेन्सी – स्पेनिस ला लिगाको शीर्ष दुई स्थानमा रहेका टोली बार्सिलोना र एट्लेटिको म्याड्रिडले लज्जास्पद हार बेहोरेका छन् । ला लिगा अन्तर्गत शनिबार राति भएको खेलमा बार्सिलोनाले सेल्टा डि भिगोसँग तथा एट्लेटिकोले इस्पान्योलसँग हार बेहोरेको छ ।

सेल्टा डि भिगोले आफ्नै मैदानमा बार्सिलोनालाई २–० ले स्तब्ध बनाएको हो । सेल्टाको जितमा म्याक्सीमिलियानो गोमेज र इगो आसपासले गोल गरे । बार्सिलोनाले अग्रपङ्तिका दुई फरवार्ड लियोनेल मेस्सी र लुइस सुआरेजसँगै अधिकांश पहिलो रोजाईका खेलाडीलाई सेल्टाविरुद्धको खेलमा विश्राम दिएको थियो ।

पहिलो हाफ गोलरहित बराबरीमा सकिएपनि घरेलु टोलीले दोस्रो हाफमा दुई गोल गर्न सफल भएको थियो । ६७औं मिनेटमा म्याक्सीमिलियानोले गोल गर्दै घरेलु टोलीलाई अग्रता दिलाएका थिए । ८८औं मिनेटमा इगो आसपासले पेनाल्टीमा गोल गर्दै सेल्टालाई २–० को जित दिलाए ।

हारसँगै बार्सिलोनालाई अंकतालिका कुनै प्रभाव परेको छैन । यसअघि नै च्याम्पियन बनिसकेको बार्सिलोनाको ३६ खेलबाट ८३ अंक रहेको छ । बार्सिलोनामाथिको महत्वपुर्ण जितसँगै सेल्टा डि भिगो ४० अंक जोडेर १४औं स्थानमा उक्लिएको छ ।

शनिबार राति नै भएको अर्काे खेलमा दोस्रो स्थानमा रहेको एट्लेटिको मड्रिडले इस्पान्योलसँग ३–० को लज्जास्पद हार बेहो¥यो । इस्पान्योलको जितमा बोर्जा इगलेसियसले दुई गोल गर्दा एक गोल उपहार पाएको थियो ।

घरेलु टोली पहिलो हाफमा डिएगो गोडिनको आत्मघाती गोलबाट अघि बढेको थियो । ५२औं मिनेटमा बोर्जाले गोल गर्दै अग्रता दोब्बर बनायो । ८९औं मिनेटमा बोर्जाले पेनाल्टीमार्फत गोल गर्दै आफ्नो टोलीलाई ३–० को जित दिलाए ।

हारपछि एट्लेटिकोको ३६ खेलबाट ७४ अंक रहेको छ । इस्पान्योल ४७ अंक जोडेर नवौं स्थानमा उक्लिएको छ ।

ला लिगाका अन्य खेलको नतिजा
लेभान्टे विरुद्ध रायो भलेकानो (४–१)
डिर्पाेटिभो अलाभेस विरुद्ध रियल सोसिडाड (०–१)