हामेस रोड्रीग्वेज : न बायर्नमा अटे, न रियल चाहन्छ

एजेन्सी – कोलोम्बियन मिडफिल्डर हामेस रोड्रीग्वेज अहिले जर्मन क्लब बायर्न म्युनिखबाट खेलिरहेका छन् । दुई वर्षको लोनमा स्पेनिस क्लब रियल म्याड्रिडबाट बायर्न पुगेका उनलाई जर्मन क्लबले खरिद नगर्ने भएको छ ।

दुई क्लबको सम्झौता अनुसार बायर्नले जुन १५ सम्म रोड्रीग्वेजलाई खरिद गर्ने प्रस्ताव राख्न सक्छ । तर उनको पछिल्लो प्रदर्शन र प्रशिक्षक निको कोभाचसँग सम्बन्ध हेर्दा रोड्रीग्वेजको जर्मन क्लबमा भविष्य देखिन्न । त्यसैकारण उनले रियल फर्कनुको विकल्प छैन ।

सिजनको सुरुवातमा जुलेन लोपेटेगुई रियलको प्रशिक्षक रहँदा हामेसले स्पेन फर्कने चाहना व्यक्त गरेका थिए । त्यसै कारण बायर्नका प्रशिक्षक कोभाच रोड्रीग्वेजसँग निराश भएका हुन् । सन् २०१४ मा ८० मिलियन युरो खर्चेर रियलले हामेसलाई क्लबमा ल्याएको थियो । तर उनी लामो समय क्लबमा जम्न सकेनन् ।

सन् २०१७ मा जिदान नै प्रशिक्षक भएको बेलामा हामेसले बर्नाबाउ छाडेका थिए । अब सन् २०२१ सम्म सम्झौता बाँकी रहेका कारण रियलले हामेस्का लागि नयाँ ट्रान्सफरको प्रस्ताव सुन्ने तयारी गरेको छ । उनलाई युरोपका अन्य क्लबले पछ्याउने सम्भावना रहेको छ । बायर्न र रियलमा भने उनको भविष्य अर्को सिजनका लागि देखिँदैन ।