एजेन्सी – युइएफए युरोपा लिग फुटबलको सेमिफाइनलको पहिलो लेगमा इंग्लिस क्लब आर्सनलले स्पेनिस क्लब भ्यालेन्सियामाथि सहज जित निकालेको छ ।

घरेलु मैदान इमिरेट्स स्टेडियममा बिहीबार राति भएको खेलमा आर्सनलले भ्यालेन्सियामाथि ३–१ को सहज जित निकालेको हो । आर्सनलको सहज जितमा एलेक्जेन्डर लाकाजेटले दुई तथा पिएरे एमेरिक औबामेयाङले एक गोल थपे । भ्यालेन्सियाका मौकटार डियाखावीले एक गोल फर्काए ।

घरेलु टोली आर्सनलले एक गोलले पछि परेको अवस्था उल्ट्याएर सहज जित निकालेको हो । खेलको ११औं मिनेटमा मौकटार डियाखावीले गोल गर्दै पाहुना टोलीलाई सुरुवाती अग्रता दिलाएका थिए । तर, भ्यालेन्सियाको त्यो अग्रता लामो समय टिकेन ।

१८औं मिनेटमा लाकाजेटले बराबरी गोल फर्काए । २६औं मिनेटमा लाकाजेटले व्यक्तिगत दोस्रो तथा टिमका लागि दोस्रो गोल गर्दै आर्सनललाई २–१ ले अघि बढाए । लाकाजेटको दोस्रो गोल भिएआरको सहायतामा मान्यता पाएको थियो । उनको प्रहारले गोल लाइन कटेपनि भ्यालेन्सियाका गोलरक्षक नेटोले बाहिर फालेका थिए ।

इन्ज्युरी समयमा पिएरे एमेरिक औबामेयाङले गोल गर्दै चेल्सीलाई ३–१ को सहज जित दिलाए । जितसँगै आर्सनलले फाइनल पुग्ने सम्भावना बलियो बनाएको छ । दोस्रो लेग भ्यालेन्सियाको घरेलु मैदानमा १० मे १० मा हुनेछ ।