काठमाडौं (हाम्रो खेलकुद)– सरकारले राष्ट्रिय क्रिकेट टोली, सागको स्वर्ण विजेता यू २३ टोली र विश्व शारीरिक सुगठन च्याम्पियनसिपका स्वर्ण पदक विजेता महेश्वर महर्जनलाई नगद पुरस्कारसहित सम्मान गरेको छ ।

सिंहदबारमा बिहीबार आयोजित कार्यक्रममा युवा तथा खेलकुद मन्त्री जगत विश्वकर्माले खेलाडीहरुलाई नगद प्रदान गरे । मन्त्री परिषद्को माघ २५ गते बसेको बैठकले महर्जन, क्रिकेट टोली र फुटबल टोलीलाई नगद पुरस्कार दिने निर्णय गरेको थियो ।

गत वर्ष संयुक्त अरब इमिरेन्ट्स (यूएई) लाई वान डे र टि ट्वान्टी सिरिजमा हराउने नेपाली टोली र सन् २०१६ मा भारतमा भएको १२ औं दक्षिण एसियाली खेलकुद (साग) मा स्वर्ण पदक जित्ने नेपाली युवा फुटबल टोली पुरस्कृत गरिएको हो ।

त्यस्तै डिसेम्बरमा थाइल्यान्डको चेनमाईमा भएको १० औं विश्व शारीरिक सुगठन च्याम्पियनसिपको ७५ केजीमा महेश्वरले स्वर्ण पदक जितेका थिए । विश्व शारीरिक सुगठनमा स्वर्ण जित्ने महेश्वर एक्लो नेपाली खेलाडी हुन् । महेश्वर एसियाली शारीरिक सुगठनका पनि एक्लो स्वर्णधारी नेपाली खेलाडी हुन् । महेश्वरले ५ लाख रुपैयाँ प्राप्त गरे ।

नेपालले युएईसँगको तीन वान डे र तीन टि ट्वान्टी समान २–१ ले जितेको थियो । गत वर्ष नेपालले वान डे मान्यता पाएयता जितेको पहिलो श्रृखंला थियो । क्रिकेट टोलीका खेलाडीलाई जनही ५ लाख रुपैयाँ , प्रशिक्षकलाई ३ लाख र टोलीका अन्य सदस्यलाई जनही २ लाख रुपैयाँ दिने निर्णय अनुसार नगद वितरण भएको थियो । सागको स्वर्ण पदक जित्ने नेपाली यू २३ फुटबल टोलीका सदस्यलाई थप ३ लाख रुपैयाँ दिने निर्णय गरेको छ ।

सरकारले यसअघि फुटबल टोलीका सागका अन्य पदक विजेता खेलाडीका साथ जनही २ लाख रुपैयाँ उपलब्ध गराएको थियो । तत्कालिन युवा तथा खेलकुद मन्त्री सत्यनारायण मण्डलले सागमा स्वर्ण जित्ने फुटबल टोलीका सदस्यलाई ५ लाख रुपैयाँ दिने घोषणा गरेका थिए । सन् २०१६ मा नेपालले भारतलाई हराउँदै सागको उपाधि जितेको थियो ।

क्रिकेट, फुटबल र शारीरिक सुगठनका खेलाडीलाई गरि सररकाले १ करोड ५६ लाख रुपैयाँ प्रदान गरेको हो ।