काठमाडौं (हाम्रो खेलकुद) – एएफसी कप अन्तर्गत समूह ‘ई’ को सिग्नेचर मनाङ मर्स्याङदी क्लबले पहिलो अंक जोडेको छ । बुधबार भएको समूहको तेस्रो खेलमा मिनेर्भा पन्जाबलाई २-२ को बराबरीमा रोक्दै मनाङले अंकको खाता खोलेको हो ।

भारतको भुवनेश्वरस्थित कालिंगा रंगशालामा पहिलो हाफको खेलमा मनाङ १-० ले पछाडी रहेको मनाङले दोस्रो हाफमा बराबरी गोल गरेको थियो । तर खेलको ५ मिनेट समय बाँकी छँदा मिनेर्भाले पेनाल्टीमा अग्रता लिँदै खेलमा पुन: अग्रता बनायो । अन्तिम समयमा गोल फर्काउँदै मनाङले मिनेर्भालाई जितबाट बन्चित गर्यो ।

खेलको आठौं मिनेटमा श्रेयसको गोलमा मिनेर्भाले अग्रता लिएको थियो । मनाङका डिफेन्सले पेनाल्टी क्षेत्रभित्र बललाई क्लियर गर्न खोजेको बल श्रेयसलाई लाग्दै गोलमा परिणत भएको थियो । खेलको ३४ औं मिनेटमा मनाङले खेल बराबरी गर्ने अवसर पनि पाएको थियो । पेनाल्टीमा मनाङका सुजल श्रेष्ठको प्रहार गोलरक्षक अर्शदिप सिंहले बचाएपछि मिनेर्भाले अग्रता जोगाएको थियो ।

दोस्रो हाफको ६८ औं मिनेटमा मनाङले खेल बराबरीमा ल्यायो । कमल श्रेष्ठको लो क्रसमा अभिषेक रिजालले पेनाल्टी क्षेत्र भित्रबाट उत्कृष्ट टर्नमा प्रहार गरेको सट गोलमा परिणत भएको थियो । ८५ औं मिनेटमा मिनेर्भाका नुरेन करीमले पेनाल्टीमा गोल गर्दै मिनेर्भालाई खेलमा अग्रता दिलाए ।

तर नियमित समयको अन्तिम मिनेटमा आडीलेजे सोमिडेले मनाङका लागि बराबरी गोल फर्काए । उनले कमल श्रेष्ठको क्रसलाई हेडरमार्फत गोलमा परिणत गरेका थिए ।

यस बराबरीसँगै मनाङले एएफसी कपको ३ खेलमा १ बराबरी र २ हारसँगै १ अंक जोडेको छ । समूहमा चेन्नईयन ३ खेलमा ७ अंकसाथ शीर्ष स्थानमा छ भने अबहानी ४ अंक जोड्दै दोस्रोमा छ । सबै तीन खेल बराबरी खेलेको मिनेर्भा तेस्रो स्थानमा छ ।