एजेन्सी – यूईएफए च्याम्पियन्स लिग फुटबलको दोस्रो सेमिफाइनलमा स्पेनिस क्लब बार्सिलोनाले साविकको उपविजेता तथा इंग्लिस क्लब लिभरपुलको आतिथ्यता गर्दैछ ।

च्याम्पियन्स लिग अन्तरगतको सेमिफाइनलको पहिलो लेगको खेल बार्सिलोनाको घरेलु मैदान नोउ क्याम्पमा हुन लागेको हो । खेल राति १२ः४५ बजे सुरु हुनेछ । बार्सिलोना र लिभरपुलको खेल निकै रोमाञ्चक र प्रतिस्पर्धात्मक हुने अनुमान गरिएको छ ।

घरेलु टोली बार्सिलोना लिभरपुललाई पराजित गर्दै फाइनल पुग्ने सम्भावनालाई बलियो बनाउन चाहन्छ । घरेलु टोली बार्सिलोना आधुनिक फुटबलका हस्ती लियोनेल मेस्सीको कप्तानीमा लिभरपुलविरुद्ध मैदान उत्रनेछ ।

लुइस सुआरेज र फिलिपे कौटिन्हो आफ्नो पुर्व क्लब लिभरपुलविरुद्ध मैदान उत्रने पक्का छ । सुआरेज र कौटिन्होले लिभरपुललमा निकै राम्रो प्रदर्शन गरेको थिए । मेस्सी, सुआरेज र कौटिन्हो नै लिभरपुलविरुद्धको खेलमा बार्सिलोनाको मुख्य हतियार हुनेछन् । उनीहरुलाई इभान राकिटिच, आर्थर र सर्जियो बुस्केट्सले साथ दिनेछन् ।

इंग्लिस क्लबविरुद्ध घरेलु मैदानमा बार्सिलोनाले पछिल्लो १० वर्षमा च्याम्पियन्स लिगमा हार बेहोरेको छैन । यसअघिका सबै २७ भेटमा बार्सिलोना विजयी भएको छ । यही जितलाई बार्सिलोना निरन्तरता दिने योजनामा हुनेछ । च्याम्पियन्स लिगमा घरेलु मैदानमा बार्सिलोना ३१ खेलमा अपराजित छ । जसमा २८ जित र ३ बराबरीको नतिजा छ ।

यता, गतवर्षको उपविजेता लिभरपुल बार्सिलोनालाई स्तब्ध बनाउदै फाइनल पुग्ने सम्भावना बलियो बनाउँदै घरेलु मैदानमा हुने दोस्रो लेगलाई सहज बनाउने लक्ष्यमा मैदान उत्रनेछ । यो सिजन निकै नै उच्च प्रदर्शन गरेको लिभरपुलसँग मोहम्मद सलाह, साडियो माने र रोवर्टाे फिर्मिनो जस्ता स्तरीय खेलाडीको साथ छ । उनीहलाई जिओरजिनियो वाईनाल्डम, जोर्डन हेन्डरसन, फाविन्हो, एन्डी रोबर्टसन र भर्जिल भान डाइकले साथ दिनेछन् ।

लिभरपुल बार्सिलोनाविरुद्धको पछिल्लो चार भेटमा अपरजित छ । जसमा समान २ जित र बराबरीको नतिजा छ । बार्सिलोनाले पछिल्ला ५ मध्ये चार खेलमा जित तथा एक खेल बराबरी खेलेको छ । लिभरपुल सबै ५ खेलमा जित निकाल्न सफल भएको छ । त्यसैले यि दुई टोलीको खेल निकै रोचक हुने अनुमान गरिएको छ । दोस्रो लेग लिभरपुलको मैदान एनफिल्डमा ८ मे मा हुनेछ ।