काठमाडौं (हाम्रो खेलकुद) – एएफसी कप २०१९ को तेस्रो चरणको खेलमा नेपाली लिग च्याम्पियन सिग्नेचर मनाङ–मस्र्याङ्दी क्लबले घरेलु टोली तथा भारतीय आइ लिग च्याम्पियन मिनेर्भा पन्जाबसँग प्रतिस्पर्धा गर्दैछ ।

मनाङ र मिर्नेभाबीचको खेल नेपाली समय अनुसार साँझ ६ः४५ बजेपछि हुनेछ । खेल भारतको भुवनेश्वरस्थित कालिंगा रंगशालामा हुनेछ ।

समूह ‘ई’ मा मनाङ र पन्जाब दुवै टोली पहिलो जितको खोजीमा हुनेछ । मनाङले सुरुवाती दुवै खेल गुमाएको छ । मनाङ घरेलु मैदानमा भएको पहिलो खेलमा बंगलादेहको अवहानी लिमिटेडसँग १–० ले तथा भारतको चेन्नइयिन फुटबल क्लबसँग २–० ले पराजित भएको थियो । मिर्नेभा पन्जाब अपराजित रहेपनि पहिलो जितको खोजीमा हुनेछ ।

मनाङका प्रशिक्षक छिरिङ लोप्साङले भारतीय क्लबविरुद्ध स्पष्ट जितको लक्ष्यसहित दबाबमुक्त रुपमा मैदान उत्रने बताएका छन् ।

‘हामीलाई मुख्य चुनौती गर्मी हो । हामी मौसमसँग घुलमिल हुने प्रयासमा छौं । हामीले सुरुवाती दुवै खेल गुमाएपनि टिमलाई कुनै प्रेसर छैन । मिर्नेभाविरुद्ध दवावमुक्त भएर खेल्नेछौं ’ प्रि म्याच पत्रकार सम्मेलनमा प्रशिक्षक लोप्साङले भने, ‘एएफसी कप अघिबाट मैले टिम हेर्न थालेको हो । मैले केही खेलाडीहरु परिवर्तन गरेको छु । टिम सन्तुलित बनेको छ ।’

कप्तान विराज महर्जनले भारतीय फुटबलसँग जानकार रहेकाले खेल्न खासै गाह्रो नहुने बताए । मिर्नेभाविरुद्ध तीन अंकका लागि खेल्नै बताउदै कप्तान महर्जनले आफ्नो सहयात्री खेलाडी एडिलाजा सोमिडेविपक्षी टोलीविरुद्ध जानकार भएकाले त्यसको फाइदा उठाउने बताए ।

मिर्नेभाका प्रशिक्षक सचिन बाडादेले अघिल्लो चरण प्रवेशको लागि सहज बनाउन मनाङविरुद्ध ३ अंकको लागि खेल्ने बताए । उनले मौसम आफु अनुकुल रहेको र मौसमको फाइदा उठाउने बताए ।

समूह ‘ई’मा चेन्नइयिन ४ अंकसहित शीर्ष स्थानमा तथा समान ४ अंक नै रहेपनि अबहानी दोस्रो स्थानमा रहेको छ । मिर्नेभा २ अंकसहित तेस्रो स्थानमा छ । मनाङ अंकबिहीन पुछारमा रहेको छ ।