इलाम (हाम्रो खेलकुद)- पाहुना टोली भुटानको पारो एफसीमाथी ३–० गोल अन्तरको जित निकाल्दै विभागीय टिम नेपाल पुलिस क्लब काँकडभिट्टामा जारी मेची नेत्रालय मेचीनगर गोल्डकपको सेमीफाइनल प्रवेश गरेको छ ।

आज भएको तेश्रो क्वाटरफाइनल खेलमा पुलिसको जितका लागी भरत शाह र रवि पासवानले गोल गरे । पहिला हाफको इन्जुरी समयमा तेज तामाङको फ्रिकिकमा मानबहादुर परियार मिलाइएको पासलाई जाली चुमाउदै कप्तान भरत शाहले सुरुवाती अग्रता दिलाएका थिए ।

५६ औ मिनेटमा सुमन लामाको पासमा रवि पासवानले अग्रता २–० बनाए । त्यसको २ मिनेट नवित्दै रविले व्यक्तिगत दोश्रो गोल गरे । खेलमा दुवै टिमले पाएका केही सुन्दर अवसरहरु गोलमा परिणत हुन सकेन ।

१८ औं मिनेटमा भरत शाहको प्रहार भुटानका गोलरक्षक कर्मा छोपेलले बचाए । ३० औं मिनेटमा निरकुमार राईको प्रहार पोष्ट नजिकैबाट बाहिरियो । ३५ औ मिनेटमा आशिष गुरुङको हेडर बारमा लागेर फर्कियो ।

३३ औ मिनेटमा भुटानका करण राईको प्रहार पुलिसका गोलरक्षक शत्रुघन चौधरीले बचाए । ४६ औ मिनेटमा दिवस सुब्बाको कडा प्रहार गोलरक्षक चौधरीले पञ्च गरेर फर्काए । ४९ औ मिनेटमा भुटानका सेड्रिक अबाले गोल गर्ने अवसर खेर फाले ।

खेलको म्यान अफ द म्याच बिजेता टीम नेपाल पुलिस क्लबका रवी पासवान भए । उनले नगद ११ हजार रुपैंया पुरस्कार पाए । मंगलबारको खेल रुस्लान थ्रि स्टार क्लब काठमाण्डौ र माईभ्याली फुटबल क्लब इलामबीच हुने छ ।

बैशाख १२ गतेदेखि शरु भएको प्रतियोगितामा नेपालका ८, क्यामरुनको दाउफिन्स एफसी र भुटानको पारो एफसीको सहभागिता रहेको छ । प्रतियोगिताको बिजेताले १० लाख १ हजार, उपबिजेताले ५ लाख १ हजार रुपैया पुरस्कार पाउने छ ।

पुलिसका प्रशिक्षक अनन्तराज थापाले पहिलो पटकको भेटका कारण शुरुमा स्कोर हुन नसकेको बताए । उनले खेलाडीको तालमेलका कारण जित निकाल्न सकिएको बताए । भुटानका प्रशिक्षक पुष्पलालले कृतिम मैदानमा खेल्ने खेलाडीलाई प्रकृतिक मैदानका कारण खुलेर खेल्न नपाएको टिप्पणी गरे । उनले नियमित खेल्ने ६ जना खेलाडीको अनुपस्थितीमा सोचेअनुकुलको नतिजा निकाल्न नसकिएको बताए ।

भुटान नेशनल लिग उपविजेता पारोले जारी सिजनमा रुस्लान थ्रीस्टार क्लबलाई १–० ले हराउँदै जिग्मे दोर्जे वाङचुक गोल्डकपको उपाधी जितेको थियो भने पुलिसले सिजनको सर्वाधिक राशीको खप्तड गोल्डकपको उपाधी जितेको छ । पारोले यसअघि सर्लाहीमा सम्पन्न तेश्रो राजर्षी जनक कपमा सेमीफाइनलसम्मको यात्रा तय गरेको थियो ।