एजेन्सी – इन्ज्युरी समयमा नर्नवर्ग पेनाल्टीमा चुक्दा शीर्षस्थानको बायर्न म्युनिख हारबाट जोगिएको छ । जर्मन बुन्डेस लिगा अन्तर्गत आइतबार राति भएको खेलमा शीर्षस्थानको बायर्न नर्नवर्गसँग १–१ गोलको बराबरीमा रोकिएको हो ।

शीर्षस्थानको बायर्न बराबरीमा रोकिएसँगै जर्मन बुन्डेस लिगाको उपाधि होड अझै खुला रहेको छ । बुन्डेस लिगाको तीन चरणको खेल बाँकी रहँदा शीर्षस्थानको बायर्न र बोरुसिया डर्टमन्डबीच २ अंकको मात्रै फरक छ ।

बायर्नको ३१ खेलबाट ७१ अंक जोडेर शीर्षस्थानमा रहेको छ । दोस्रो स्थानको बोरुसिया डर्टमन्ड ६९ अंक छ । बराबरीपछि नर्नवर्ग रेलिगेसन जोनको १७औं स्थानमा छ ।

अब बायर्नले ह्यानोभर, आरबी लेपिजिज र फ्रान्कफर्टसँग खेल्न बाँकी छ । डर्टमन्डले वेरडर ब्रेमेन, फोर्टुना र बोरुसिया मोन्चेग्लावाचसँग खेल्न बाँकी छ ।

घरेलु मैदानमा प्रतिस्पर्धात्मक बनेको खेलको पहिलो हाफ गोलरहित बराबरीमा सकिएपनि दोस्रो हाफको शुरुमै नर्नवर्गले अग्रता लिन सफल भएको थियो । म्याथ्युज पेरेराले गोल गर्दै घरेलु टोलीलाई सुरुवाती अग्रता दिलाएका थिए ।

तर, ७५औं मिनेटमा सर्जि जिनाब्रीले बराबरी गोल फर्काए । घरेलु टोलीले खेलको इन्ज्युरी समयमा प्राप्त पेनाल्टीलाई सदुपयोग गर्न नसक्दा बराबरीमा रोकिन पुग्यो ।

बायर्नका अलफान्सो डेभिसले जर्ज मार्गेटरलाई एलबो प्रहार गरेपछि रेफ्रीले नर्नवर्गलाई पेनाल्टीको मौका दिएको थियो । तर, पेनाल्टीमा टिम लेइवोल्ड चुके ।