म्यानचेस्टर (एजेन्सी)– चेल्सीका पेद्रोले प्रिमियर लिगमा आफ्नो टोलीले शीर्ष चार भित्र पर्नका लागि म्यानचेस्टर युनाइटेडसँग आज हुने खेल फाइनल सरह हुने बताएका छन् । शीर्ष चारका दाबेदारमध्येका युनाइटेड र आर्सनल पछिल्ला खेलमा पराजित भएपछि चेल्सीलाई केहि सहज भएको छ । शीर्ष चारमा पर्ने टोली अर्को वर्ष च्याम्पियन्स लिगका लागि छनोट हुनेछ ।

आइतबार युनाइटेडसँग हुने खेल चेल्सीका लागि यो अवस्थामा सबैभन्दा चुनौतीपूर्ण हुनसक्छ । पेद्रोले युनाइटेडसँगको खेलको महत्वका बारेमा भनेका छन्, ‘यो फाइनल जस्तो हो । शीर्ष चारमा पर्नका लागि खेल महत्वपूर्ण छ । हामी युनाइटेडमा जित चाहन्छौ.। हामीलाई थाहा छ त्यो सजिलो छैन ।’

पेद्रोले युनाइटेडमा पनि निकै राम्रा खेलाडी रहेको उल्लेख गर्दै उनले पनि त्यत्तिकै बलियो रहेको बताए । ‘अहिलेको क्षणमा उनीहरु एकदम राम्रो लयमा छैनन् । त्यसैले हामीले जितका लागि संघर्ष गर्नुपर्दछ,’ उनले भने, ‘तीन अंक लिनका लागि यो महत्वपूर्ण अवसर हो ।’

आफ्नो फिटनेसका बारेमा पेद्रोले थपे, ‘मलाइ ठिकै महसुस भइरहेको छ । सायद म आइतबार पहिलो रोजाइमा हुने छैन । तर मेरो लागि नतिजा महत्वपूर्ण हो । म खेलमै केन्द्रित छु । हामी चाहन्छौं, चाहेको नतिजा निकाल्न सकौं ।’

समान ३५ खेलमा चौथो स्थानको चेल्सीको ६७ अंक र युनाइटेडको ६४ अंक छ । एक खेल बढी खेलेको पाँचौ स्थानको आर्सनलको ६६ अंक छ । आर्सनल आइतबारको खेलमा लेस्टरसँग ३–० ले पराजित भएको छ ।