काठमाडौं (हाम्रो खेलकुद) – म्यानमारमा आजबाट शुरु भएको एएफसी यू–१९ महिला च्याम्पियनसिप छनोट अन्तर्गतको दोस्रो चरणको छनोटको पहिलो खेलमा नेपालले फराकिलो हार बेहोरेको छ ।

मण्डलेस्थित मण्डलरथिरी स्टेडियममा शुक्रबार भएको समूह चरणको पहिलो खेलमा नेपाले बलियो अष्ट्रेलियासँग ११–१ को फराकिलो गोलअन्तरले पराजित भएको हो । फिफा वरीयतामा छैटौ स्थानमा रहेको अष्ट्रेलियाविरुद्ध नेपाल सबै पक्षमा कमजोर देखिदा खेलभर नै दवाव झेलेको थियो ।

नेपालले पहिलो हाफमै ६ गोल खाँदै एक गोल फर्काउँदा दोस्रो हाफमा ५ गोल सामना गरेको थियो । अष्ट्रेलियाको फराकिलो जितमा सिनियर राष्ट्रिय टिममा समेत स्थान बनाइसकेकी मारी फोलरले ह्याट्रिकसहित ५ गोल गरिन् । सुसन फोनसङखाम, मेलिन्डा, रचेल लोइ, क्यारा कोनी क्रस, पेज रिले र सादिनी इभान्सले समान एक-एक गोल गरे । नेपालका लागि मन्जली कुमारी योन्जनले पहिलो हाफको इन्ज्युरी समयमामा एक गोल फर्काएकी थिइन् ।

उत्कृष्ट प्रदर्शन गर्दै एएफसी कपमा छनोट हुने लक्ष्य बनाएको नेपाल फराकिलो हारसँगै एएफसी कपमा छनोट हुने सम्भावना झिनो बनेको छ । समूह ‘ए’ को नेपालले अब २८ अप्रिलमा उज्वेकिस्तान र ३० अप्रिलमा घरेलु टोली म्यानमारसँग प्रतिस्पर्धा गर्नेछ । हरेक समूहका शीर्ष दुई टोली एएफसी यू-१९ च्याम्पियनसिपमा छनोट हुनेछन् ।

आयोजक थाइल्यान्ड, जापान, उत्तर कोरिया र चीनले एएफसी यू-१९ च्याम्पियनसिपमा स्थान बनाइसकेका छन् । छनोटको शीर्ष टोलीले एएफसी यु–१९ च्याम्पियनसिपमा स्थान बनाउने छन् ।