एजेन्सी – युवा फरवार्ड किलियन एमबाप्पेको ह्याट्रिकसँगै पेरिस सेन्ट जर्मेन (पीएसजी) प्रलृन्च लिग वान च्याम्पियन बनेको छ ।

लिग वान अन्तरगत आइतबार राति भएको खेलमा पीएसजीले मोनाकोलाई ३–१ ले पराजित गर्दै पाँच खेल अगावै फ्रेन्च लिग वान च्याम्पियन बन्न सफल भएको हो । पीएसजीको यो पछिल्लो सात सिजनमा छैटौ उपाधि हो । एक सिजन मोनाको च्याम्पियन बनेको थियो ।

पीएसजीको ३३ खेलबाट ८४ अंक पुगेको छ । पीएसजीले दोस्रो स्थानको लिलेलाई १९ अंकले पछि पारेको छ । आइतबार राति नै दोस्रो स्थानको लिले टोलुसोसँग गोलरहित बराबरीमा रोकिएसँगै पीएसजी च्याम्पियन बन्न सहज भएको हो ।

घरेलु मैदानमा पीएसजीलाई जिताउन युवा फरवार्ड एमबाप्पेले ह्याट्रिक पुरा गरे । पछिल्लो केही खेलमा गोल गर्न असफल हुदा एमबाप्पेको आलोचना सुरु भएको थियो ।

खेलको १५औं मिनेटमा एमबाप्पेको पहिलो गोल गरे । ३८औं मिनेटमा एमबाप्पेले दोस्रो गोल गर्दै पीएसजीलाई पहिलो हाफमा २–० को अग्रता दिलाए । ५६औं मिनेटमा एमबाप्पेले ह्याट्रिक पुरा गरे । ८०औं मिनेटमा एलेसन्दर गोलोभिनले सान्त्वाना गोल गरे । पराजित मोनाको ३३ खेलबाट ३२ अंक जोडेर १६औं स्थानमा छ ।

यही खेलबाट नेयमार जुनियरले तीन महिनापछि खेलमा पुनरागमन गरे । नेयमार दोस्रो हाफमा लेभिन कुर्जावाको स्थानमा मैदान प्रवेश गर्दै पुनरागमन गरे । नेयमारले ३ महिनाअघि फ्रेन्च कप दौरान स्टार्सवर्गविरुद्धको खेलमा मेटाटर्सलमा चोट बोेकेका थिए ।