एजेन्सी – क्याटलान क्लब बार्सिलोनाले स्पेनिस ला लिगाको उपाधि यात्रालाई थप मजवुत बनाएको छ । ला लिगा अन्तर्गत शनिबार राति भएको खेलमा बार्सिलोनाले रियल सोसिडाडलाई २–१ ले पराजित गर्दै उपाधि यात्रालाई थप मजवुत बनाएको हो।

ला लिगा संघारमा पुग्दा बार्सिलोनाको ३३ खेलबाट ७७ अंक पुगेको छ । दोस्रो स्थानको एट्लेटिको मड्रिडको समान खेलबाट ६८ अंक रहेको छ । एक खेल कम खेलेको तेस्रो स्थानको रियल मड्रिडको ६१ अंक छ ।

ला लिगामा अब पाँच खेल बाँकी रहँदा बार्सिलोनाले दोस्रो स्थानको एट्लेटिकोसँग ९ अंकको तथा रियलसँग १६ अंकको फराकिलो अग्रता बनाएको छ । बार्सिलोनाले अब च्याम्पियन बन्न ५ मध्ये दुई खेल जिते पनि पर्याप्त बन्नेछ । बार्सिलोनाले दुई खेल जितेको अवस्थामा एट्लेलिटको सबै ५ खेल जितेपनि बार्सिलोना गोल अन्तरमा च्याम्पियन बन्ने छ ।

नोउ क्याम्पमा शनिबार राति प्रतिस्पर्धात्मक बनेको खेलमा बार्सिलोनाले पहिलो गोलको लागि निकै संघर्ष गर्नुपरेको थियो । ४५औं मिनेटमा औसमाने डेम्वेलेको पासमा गोल क्लेमेन्ट लेङ्लेटले गाल गर्दै बार्सिलोनालाई सुरुवाती अग्रता दिलाएका थिए ।

६२औं मिनेटमा जुवानमीले गोल गरेपछि खेल १–१ को बराबरीमा पुगेको थियो । तर, त्यसको दुई मिनेटपछि नै कप्तान लियोनेल मेस्सीको पासमा जोर्डी अल्वाले गोल गर्दै बार्सिलोनालाई २–१ को जित दिलाए ।