एजेन्सी – यूईएफए च्याम्पियन्स लिग अन्तर्गत क्वाटरफाइनल चरणका खेलहरु समाप्त भएसँगै यस वर्षको ब्यालोन डी’ओर उपाधि भिडन्तमा पनि यस नतिजाले असर पर्ने देखिएको छ ।

उपाधिका बलिया दावेदारका रुपमा अगाडी आएका क्रिस्टियानो रोनाल्डो र लिओनेल मेसीले फरक नतिजा हात पारेपछि ब्यालोन डी’ओर भिडन्तमा च्याम्पियन्स लिगको नतिजाले असर गर्ने भएको हो । रोनाल्डोको युभेन्टस घरेलु मैदानमा आयाक्ससँग पराजित हुँदै बाहिरिंदा बार्सिलोनाले म्यानचेस्टर युनाइटेडलाई पाखा लगाउँदै अन्तिम चारमा स्थान पक्का गरेको हो । रोनाल्डोले दुवै लेगमा गोल गरेपनि टोलीलाई जितसम्म पुर्याउन भने सकेनन् ।

यसैक्रममा म्यानचेस्टर युनाइटेड तथा रियल म्याड्रिडका पूर्व प्रशिक्षक जोसे मोउरिन्होले मेसीलाई रोनाल्डोभन्दा बलियो दावेदारको रुपमा हेरेका छन् । ‘मेसीले युनाइटेडविरुद्ध कठिन रणनीतिमा पनि राम्रो प्रदर्शन गरे । मेसीले आफ्नो स्तर अनुसार प्रदर्शन गरेपछि युनाइटेड पराजित हुन पुग्यो । यसले उनलाई ब्यालोन डी’ओर का लागि पनि सहयोग गर्नेछ,’ उनले भने ।

उनले बार्सिलोना र लिभरपुलको सेमिफाइनल खेल निकै राम्रो हुने बताए । ‘बार्सिलोना लिभरपुलभन्दा केहि राम्रो दर्जाको देखिएपनि खेल प्रतिस्पर्धात्मक हुनेछ । मेसीका लागि ब्यालोन डी’ओर पक्का गर्ने अवसर पनि त्यहि हुने अपेक्षा गरेको छु । रोनाल्डो च्याम्पियन्स लिगबाट बाहिरीसकेको हुँदा मेसीको सम्भावना बढी छ,’ मोउरिन्होले थपे ।