सर्लाही (हाम्रो खेलकुद) – ललितपुरको रुस्लान थ्री स्टार क्लबले वर्षको पहिलो उपाधिको रुपमा तेस्रो संस्करणको राजर्षि जनक कप फुटबल प्रतियोगिताको उपाधि जितेको छ । थ्री स्टारले आयोजक मध्येको बागमती नगरपालिकालाई २–१ ले पराजित गर्दै वर्षको पहिलो उपाधिको रुपमा राजर्षि जनक कपको उपाधि जित्न सफल भएको हो ।

सन्तोष श्रेष्ठ स्मृत्ति खेल मैदानमा शुक्रबार भएको उपाधि भिडन्तमा थ्री स्टारले एक गोलले पछि परेको स्थिति उल्ट्याएर जित हात पारेको हो । थ्री स्टारको जितमा रजिन धिमाल र सुशिल राईले गोल गरे । बागमतीका विदेशी खेलाडी इक्ने क्रिस्टयनले एक गोल फर्काए ।

प्रतिस्पर्धात्मक बनेका खेलको पहिलो हाफ गोलरहित बराबरीमा सकिएको थियो । ६४औं मिनेटमा घरेलु टोली बागमतीले विदेशी खेलाडीको गोलबाट खेलमा अग्रता बनाएको थियो । त्यसको एक मिनेट नबित्दै थ्री स्टारले पेनाल्टीमार्फत बराबरी गोल फर्कायो । सुशील राईलाई बक्समा लडाएपछि प्राप्त पेनाल्टीलाई रन्जित धिमालले सदुपयोग गरे ।

पेनाल्टी सुटआउटतर्फ धकेलिएको खेलको इन्ज्युरी समयको पहिलो मिनेटमा सुशील राईले गोल गर्दै थ्री स्टारलाई २–१ को जित दिलाउदै च्याम्पियन बनाए । मेन्साको क्रसमा मिक्चेन तामाङले हेडमा सुशीलले बक्सभित्रबाट गोल गरे । बागमतीका विजय घलान खेलको म्यान अफ दि म्याच भए । उनले १० हजार पाए ।

उपाधिसँगै थ्री स्टारले १० लाख रुपैयाँ हात पार्यो । उपविजेता बनेको आयोजक बागमतीले ५ लाख रुपैयाँमा चित्त बुझायो ।

प्रतियोगितामा सर्लाही निवासी सगुन राई बागमती राईजिङ अफ दि ईयर प्लेयर्स घोषित भए । उनले एक थान यमाहा मोटरसाइकल प्राप्त गरे ।

व्यक्तिगत विधातर्फ थ्री स्टारका सुशील राई सर्वाधिक गोलकर्ता चुनिए । बागमतीका हण तामाङ उत्कृष्ट गोलरक्षक, बागमतीकै इक्ने क्रिस्टयन उत्कृष्ट डिफेन्डर, थ्री स्टारका कप्तान बिक्रम लामा उत्कृष्ट मिडफिल्डर र थ्री स्टारका मेघराज केसी उत्कृष्ट प्रशिक्षक चुनिए । उनीहरु सबैले जनही २०–२० हजार रुपैया पाए ।

विजयी खेलाडीलाई बागमती नगरपालिकाका मेयर भरत कुमार थापा, उपमेयर लिला कुमारी योन्जन, सर्लाही क्षेत्र नम्वर ३ का केन्द्रिय सभासद् रामेश्वर यादव, सभासद डिल्ली उप्रेती, बेचु लुङ्गेली, बागमती नगरपालिका वडा नम्वर २ का वडा अध्यक्ष तथा प्रतियोगिता संयोजक दीपक लामा लगायतले पुरस्कृत गरे । २५ चैतबाट सुरु भएको प्रतियोगितामा विभिन्न १२ टोलीले सहभागिता जनाएको थियो ।