सर्लाही (हाम्रो खेलकुद)– आयोजक बागमती नगरपालिकाले सर्लाहीमा जारी तेस्रो संस्करणको राजर्षि जनक कपको फाइनलमा ए डिभिजन टोली रुस्लान थ्री स्टार क्लबसँगको भेट पक्का गरेको छ ।

बुधबार भएको दोस्रो सेमिफाइनलमा भुटानको पारो एफसीलाई ३–२ ले हराउँदै बागमतिले अन्तिम दुईको यात्रा तय गरेको हो । थ्री स्टार मंगलबार विभागीय नेपाल एपीएफ क्लबलाई २–० ले पराजित गर्दै फाइनलमा पुगिसकेको थियो ।

राष्ट्रिय टोलीका युवा फरवार्ड विमल घर्तीमगरसँगै स्टार खेलाडीहरु अमित तामाङ, सरोज दाहाल र विश्व अधिकारीसहित मैदान उत्रिएको बागमतीले उच्च प्रदर्शन गर्दा पहिलो हाफमै ३–१ को अग्रता बनाएको थियो ।
सन्तोष स्मृति खेल मैदान भएको खेलको ११औं मिनेटमा घरेलु टोलीले आत्मघाती गोलबाट अग्रता बनाएको थियो । विजय घलानको प्रहारलाई बचाउन खोज्दा पारोका खेलाडीले आफ्नै पोस्टमा गोल गरेका थिए ।

१४औं मिनेटमा पारोले पेनाल्टीमार्फत बराबरी गोल फर्कायो । पारोका पाल्साङ लामाले पेनाल्टीमार्फत गोल गरे । १८औं मिनेटमा विजय घलानले गोल गर्दै घरेलु टोलीलाई २–१ को अग्रता दिलायो । २३औं मिनेटमा क्रिस्टियन इकेनेले गोल गर्दै घरेलु टोलीलाई पहिलो हाफमै ३–१ को अग्रता दिलाएका थिए ।

दोस्रो हाफमा बागमतीका गोलरक्षक अरुण तामाङले उच्च प्रदर्शन गर्दै बागमतीलाई फाइनलको बाटो डो¥याए । उच्च प्रदर्शन गरेका बागमतीका गोलरक्षक अरुण तामाङ खेलको म्यान अफ दि म्याच घोषित भए । उनले १० हजारु रुपैयाँ प्राप्त गरे ।

बागमति नरपालिका र बागमती युवा क्लबले संयुक्त रुपमा आयोजना गरेको प्रतियोगिताको फाइनल शुक्रबार हुनेछ । प्रतियोगिताको विजेताले १० लाख र दोस्रो हुने टोलीले ५ लाख रुपैयाँ प्राप्त गर्नेछन् ।