सर्लाही (हाम्रो खेलकुद)–रुस्लान थ्री स्टार क्लब सर्लाहीमा जारी तेस्रो संस्करणको राजर्षि जनक गोल्डकपको फाइनलमा पुगेको छ । ए डिभिजन प्रतिद्धन्द्धि नेपाल एपिएफ क्लबलाई २–० ले हराउँदै थ्री स्टार वर्षको पहिलो प्रतियोगिताको फाइनलमा पुगेको छ ।

सन्तोष स्मृति खेल मैदानमा थ्री स्टारको जितमा सुशिल राई र दिनेश राजवंशीले गोल गरे । ३०औं मिनेटमा सुशिलले गोल गर्दै थ्री स्टारलाई अग्रता दिलाएका थिए । पासमा अनमार्क रहेका सुशिलले बक्स भित्र वान टचमा गोल गरेका थिए ।

७७औं मिनेटमा डिफेन्डर दिनेश राजंवंशीको प्रहार सिधै गोलमा परिणत हुँदा थ्री स्टार २–० ले अगाडि रह्यो । करिब ३५ यार्ड टाढाबाट गरेको दिनेशको प्रहारलाई एपीएफका गोलरक्षकले बचाउने प्रयास गरेपनि दोस्रो बारको टप कर्नरबाट गोल भएको थियो ।

अन्ततः त्यो अग्रतालाई जोगाउँदै थ्री स्टार अन्तिम दुईमा पुग्यो । थ्री स्टारका दिनेश खेलको म्यान अफ दी म्याच घोषित भए र उनले १० हजार रुपैयाँ प्राप्त गरे ।

प्रतियोगितामा बुधबार आयोजक बागमती नगरपालिका र भुटानको पारो एफसीबीच दोस्रो सेमिफाइनल हुनेछ । प्रतियोगिताको विजेताले उपाधिसहित १० लाख रुपैयाँ र दोस्रो टोलीले ५ लाख रुपैयाँ प्राप्त गर्नेछ ।

बागमती युवा क्लब र बागमती नगरपालिकाको संयुक्त आयोजनामा जारी प्रतियोगितामा १२ टोलीको सहभागिता रहेको थियो ।