काठमाडौं (हाम्रो खेलकुद)- काभ्रेको बनेपा ब्वाइज क्लब (बीबीसी) को आयोजनामा बीबीसी कप नाइन ‘ए’ साइड फुटबल प्रतियोगिता बैशाख २० गतेबाट आयोजना हुने भएको छ ।

सिजी ब्रुअरीको उत्पादन नेपाल आइसको मुख्य प्रायोजनमा हुन लागेको प्रतियोगिताको उद्देश्य काभ्रेमा फुटबललाई अझै लोकप्रिय र स्थानिय खेलाडी उत्पादन गर्ने लक्ष्यान प्रतियोगिता आयोजना गर्न लागिएको क्लबका अध्यक्ष महेश कर्माचार्यले पत्रकार सम्मेलनमा जानकारी गरायो ।

नकआउटका आधारमा हुने प्रतियोगितामा बढीमा ३२ क्लबको सहभागिता रहने क्लबले अनुमान गरेको छ ।
प्रतियोगिता बनेपा बहु प्राविधिक शिक्षालय बनेपाको मैदानमा बैशाख २० गतेबाट जेठ २ गतेसम्म सञ्चालन हुनेछ ।
काभ्रे जिल्लाको फुटबल बिकास र राष्ट्रिय खेलाडी उत्पादन गर्ने उद्देश्यले बीबीसी २०६७ सालमा स्थापना भएको थियो स्थापना कालदेखि नै सहिद स्मारक ‘सी’ डिभिजन लिगको छनोट खेलेपनि बीबीसी छनोट हुन सकेको छैन । तर, क्लबबाट उत्पादित खेलाडीले राष्ट्रिय टोलीको ढोका उघारिसकेका छन् । नेपाली सेनामा रहेका जर्ज प्रिन्स कार्की बीबीसीकै उत्पादन हुन् ।
प्रतियोगिताको विजेताले २ लाख तथा दोस्रो हुनेले १ लाख रुपैया हात पार्नेछन् । प्रतियोगिताको सर्वात्कृष्ट गोलरक्षक, रक्षक, मिडफिल्ड, फरवार्ड, सर्वाधक गोलकर्ता र प्रशिक्षकले जनही ५ हजार पाउनेछन् । अनुशाषित टोलीले १० हजार रुपैया तथा हरेक खेलको म्यान अफ दि म्याचले जनही २ हजार पाउनेछन् ।
प्रतियोगितालाई सिजी ब्रुअरीको उत्पादन नेपाल आइसले मंगलबारै मुख्य प्रायोजनमा सम्झौता गरेको छ ।
सम्झौतामा क्लबका तर्फबाट महेश कर्माचार्य र नेपाल आइसको तर्फबाट नेपाल आइसका सहायक जनरल म्यानेजर नवीन पौडेलले हस्ताक्षर गरे । सम्झौतासँगै नेपाल आइसले पहिलो र दोस्रोको पुरस्कार राशिसँगै आयोजकको दुई टोलीका लागि जर्सी उपलब्ध गराउनेछ ।