एजेन्सी – युइएफए च्याम्पियन्स लिग फुटबलमा आज राति स्पेनिस क्लब बार्सिलोनाले इंग्लिस क्लब म्यानचेस्टर युनाइटेडको आतिथ्यता गर्दैछ । खेल नोउ क्याम्पमा राति १२ः४५ बजेपछि हुनेछ ।

घरेलु टोलीले पहिलो लेगमा पाएको सफलतालाई निरन्तरता दिने लक्ष्यमा हुनेछ । पहिलो लेगमा बार्सिलोना १–० ले विजयी भएको थियो । जित वा बराबरी खेले बार्सिलोना च्याम्पियन्स लिगको सेमिफाइनलमा प्रवेश गर्नेछ । हारले भने खेल लम्बिने अथवा बाहिरिने सम्भावना बढ्नेछ ।

च्याम्पियन्स लिगकै लागि बार्सिलोनाले स्पेनिस ला लिगामा हुएस्काविरुद्ध गोलरहित बराबरी भएको खेलमा पहिलो रोजाइका खेलाडीलाई विश्राम दिएको थियो । त्यसैले बार्सिलोना म्यानचेस्टरविरुद्ध खरो रुपमा मैदान उत्रने छ । बार्सिलोनासँग लियोनेल मेस्सी, लुइस सुआरेज, औसमाने डेम्वेले, इभान राकिटिक, सर्जियो बुस्केट्स र जोर्डी अल्बाजस्ता स्तरीय खेलाडीहरु रहेका छन् ।

बार्सिलोनाले घरेलु मैदानमा म्यानचेस्टर युनाइटेडसँग पराजित भएको छैन । अहिलेसम्म चार खेल खेल्दा २ जित र २ बराबरीको नतिजा छ । बार्सिलोनाले सन् २००८ मा युनाइटेडसँग गोलरहित बराबरी खेलेको थियो ।

यता, सेमिफाइनल प्रवेश गर्न जित्नै पर्ने दवावमा रहेको म्यानचेस्टर युनाइटेड घरेलु टोलीलाई पराजित गर्दै सेमिफाइनलमा प्रवेश गर्ने लक्ष्यमा हुनेछ । युनाइटेडलाई सेमिफाइनलम प्रवेश गर्न बार्सिलोनाविरुद्ध निश्चित जितको आवश्यक छ ।

पहिलो लेगमा लुक शअको आत्मघाती गोलबाट बार्सिलोनाले अग्रता बनाएको थियो । युनाइटेडसँग अग्रपङ्तिमा रोमेलु लुकाकु, पल पोग्वा, एन्थोनी मार्सियल र मार्कस रासफोर्डजस्ता खेलाडी रहेका छन् ।