एजेन्सी – फ्रान्सेली लिग अन्तर्गत साविक विजेता पेरिस सेन्ट जर्मेन (पीएसजी) ले आइतबार दोस्रो स्थानको लिलसँग ५-१ को फराकिलो हर बेहोर्यो । खेलपछि पीएसजीका स्टार फरवार्ड किलियन एमबाप्पेले आफ्नो टोलीले सिकारुले जस्तो खेलेको बताएका छन् ।

पीएसजीका जुआन बर्नाट रातो कार्ड खाँदै बाहिरीपछि लिलले दबाब सिर्जना गरेको थियो । एक समय १-० ले पछाडी रहेर खेल बराबरी गरिसकेको पीएसजी अन्त्यमा लज्जास्पद हार बेहोर्न बाध्य भयो । एमबाप्पेले च्याम्पियन हुने टोलीले यसरि हार्नु उचित नरहेको बताए । ‘ खेल निकै प्रतिस्पर्धात्मक नै थियो । एक समय हामीले दवाव दिइरहेका थियौं भने एकैछिनमा दवाव खेप्न पर्यो । हामीले च्याम्पियन हुन्छु भन्दैमा यसरी खेल्न हुँदैन्,’ उनले भने ।

‘हामीले अझै संयमता अपनाएर खेल्नुपर्छ । हामीले केहि गल्ति सुधार आवश्यक छ । फुटबल मैदानमा खेलिने खेल हो, बाहिर बोलेर मात्र केहि हुँदैन । आज हामीले सिकारु खेलाडीले जस्तो फुटबल खेल्यौं । यस्तो हार स्वीकार हुने छैन,’ लिगका सर्वाधिक गोलकर्ता एमबाप्पेले थपे ।

यता प्रशिक्षक थोमस टुचेलले भने एमबाप्पेको भनाइमा सहमति जनाएनन् । ‘हामीले सिकारुजस्तो खेलेका हैनौं । हामीले गोल गरेको पनि थियौं तर ती अफसाइड भए । लिललाई पहिलो हाफमा पूर्ण दवावमा राखेपनि दोस्रो गोल गर्न हामी असफल रहयौं,’ टुचेलले भने । उनले मुख्य खेलाडी चोटका कारण उपस्थित नहुनुले टोली फराकिलो अन्तरले पराजित भएको बताए ।