एजेन्सी – ब्राजिली लुकास मौराको ह्याट्रिक मद्दतमा टोटेनहम हस्टपरले इंग्लिस प्रिमियर लिग फुटबलमा फराकिलो जित निकालेको छ ।

घरेलु मैदानमा शनिबार राति भएको खेलमा टोटेनहमले हडर्सफिल्डलाई ४–० को फराकिलो अन्तरले पराजित गरेको हो । टोटेनहमको जितमा मौराले ह्याट्रिक पुरा गर्दा भिक्टर वानयामाले एक गोल थपे ।

एकपक्षीय बनेको खेलमा टोटेनहमले २४औं मिनेटमा भिक्टर वानयामाको गोलबाट अग्रता लिएको थियो । उनले फर्नान्डो लोरेन्टेको पासमा गोल गरेका थिए । २७औं मिनेटमा लुकास मौराले गोल गर्दै टोटेनहमको अग्रता दोब्बर बनायो । उनले मौसा सिसिकोको पासलाई सदुपयोग गरेका थिए ।

८७औं मिनेटमा क्रिस्यिन इरिक्सनको पासमा मौराले गोल थपेपछि टोटेनहम ३–० ले अघि बढ्यो । इन्ज्युरी समयको थप गरिएको तेस्रो मिनेटमा मौराले ह्युङ मिन सनको पासमा गोल गर्दै ह्याट्रिक पुरा गरेपछि टोटेनहमले ४–० को फराकिलो जित निकाल्यो ।

जितसँगै टोटेनहम ३३ खेलबाट ६७ अंक जोडेर तेस्रो स्थानमा उक्लिएको छ । अर्काे सिजनको च्याम्पियन्स लिगका लागि छनोट नजिक रहेको छ । हडर्सफिलड २० अंकसहति रेलिगेसन जोनको पुछारमा छ ।

प्रिमियर लिगका अन्य खेलका नतिजा
ब्राइटन विरुद्ध बर्नमाउथ (०–५)
बर्नली विरुद्ध कार्डिफ (२–०)
फुलहम विरुद्ध एभर्टन (२–०)
साउथ ह्याम्पटन विरुद्ध वल्भ्स (३–१)
म्यानचेस्टर युनाइटेड विरुद्ध वेस्टह्याम (२–१)