एजेन्सी – म्यानचेस्टर युनाइटेड युरोपकै शीर्ष क्लबमध्य गनिन्छ । पछिल्लो समय केहि फितलो प्रदर्शन गरेपनि क्लबको इतिहास निकै बलियो रहेको छ । विश्व फुटबलका स्टार खेलाडीले म्यानचेस्टर युनाइटेडको जर्सी लगाएका छन् । धेरै खेलाडीको सपना यस क्लबबाट खेल्ने हुन्छ ।

केहि यस्ता खेलाडी पनि छन् जसले युनाइटेडको जर्सी लगाउने मौका पाएपनि त्यहाँ रहेर राम्रो प्रदर्शन गर्न सकेनन् । ती खेलाडीले युनाइटेड छाडेर अन्यत्र गएपछि भने आफ्नो स्तरको प्रदर्शन देखाउन सके र प्रमाणित गर्न सफल रहे । प्रस्तुत छन् ५ खेलाडी जसले युनाइटेड छाडेपछि आफ्नो करिअरलाई राम्रो दिशा दिन सके :

५. विल्फ्रिड जाहा (क्रिस्टल प्यालेस, २०१५)

युनाइटेडले सन् २०१३ मा जाहालाई १० मिलियन पाउन्डमा खरिद गरेको थियो । युनाइटेडमा रहेर जम्मा ४ खेल खेलेका उनले दुई वर्षपछि ६ मिलियनमा प्यालेस पुगे । त्यसपछि लगातार राम्रो प्रदर्शन गरेका उनलाई ठूला क्लबहरुले अनुबन्धन गर्ने प्रयास गरिरहेका छन् ।

४. डिएगो फोर्लान (भिल्लारियल, २००४)

प्रिमियर लिगमा अवसर पाएर पनि आफ्नो छाप बसाउन नसकेका फोर्लान सन् २००४ मा स्पेनिस टोली भिल्लारियल गए । युनाइटेडका लागि ६३ खेलमा जम्मा १० गोल गरेका उरुग्वेका फरवार्ड फोर्लानले भिल्लारियलमा भने पहिलो सिजनमा नै २५ गोल गरे । त्यसपछि दुई सिजन त्यहाँ खेलेर उनले एटलेटिको म्याड्रिडसँग सम्झौता गरे । एटलेटिकोका आधुनिक फुटबलका लेजेण्ड मानिने उनले क्लबलाई घरेलु तथा युरोपको प्रतियोगितामा पनि सफलता दिलाए ।

३. क्रिस्टियानो रोनाल्डो (रियल म्याड्रिड, २००९)

म्यानचेस्टर युनाइटेडबाट सम्भव भएका सबै उपाधि जितेपछि रियल म्याड्रिड पुगेका रोनाल्डोले त्यसयता पनि लगातार उत्कृष्ट प्रदर्शन गरेका छन् । रियलमा झन्डै एक दशक उच्च लयमा फुटबल खेलेका रोनाल्डोलाई युभेन्टसले मोटो रकम खर्चेर अनुबन्धन गर्यो । युनाइटेडले त्यसबेला पाएको ८० मिलियन पाउन्ड अहिले निकै सस्तो सावित भएको छ ।

२. पल पोग्बा (युभेन्टस, २०१२)

युनाइटेडकै युथ एकेडेमीका भएपनि पोग्बाले सिनियर टोलीमा मौका नपाएपछि सन् २०१२ मा क्लब छाड्ने निर्णय गरे । सम्झौता सकिएपछि युभेन्टस पुगेका उनले इटालीमा चार वर्ष विश्वस्तरीय प्रदर्शन गरे । युनाइटेडले सन् २०१६ मा विश्व कीर्तिमानी रकम तिरेर उनलाई फिर्ता बोलाउनुपर्यो ।

१. जेरार्ड पिके (बार्सिलोना, २००८)

सन् २००४ मा बार्सिलोना छाडेर युनाइटेड पुगेका डिफेन्डर पिकेले युनाइटेडमा उक्त जमानाका स्टार डिफेन्डरद्वय नेमान्जा भिदिच र रिओ फर्डीनान्डसँग प्रतिस्पर्धा गर्नुपर्यो । खेल्ने कम मौका पाएपछि सन् २००८ मा उनी ५ मिलियन पाउन्डमा बार्सिलोना पुगे । त्यसबेला दुवै तर्फ यो सम्झौता राम्रो देखिएपनि त्यसयता पिकेले गरेको प्रदर्शनले भने युनाइटेडलाई घाटा पुगेको देखिन्छ ।