एजेन्सी – जर्मन क्लब आइन्ट्रयाक्ट फ्रान्कफर्टबाट पछिल्लो समय उत्कृष्ट प्रदर्शन गरिरहेका सर्बियाका फरवार्ड लुका जोभिचलाई स्पेनका दुई ठूला क्लब रियल म्याड्रिड र बार्सिलोनाले भित्र्याउन अन्तरिक तयारी थालेका छन् ।

बेन्फिकाबाट लोनमा फ्रान्कफर्ट पुगेका जोभिचले जारि सिजन २६ खेलमा १७ गोल गरेका छन् । बुन्डेसलिगाको सर्वाधिक गोलकर्ताको सुचिमा उनी रोबेर्ट लेवान्डोस्कीभन्दा पछाडी दोस्रो स्थानमा छन् । फ्रान्कफर्टले जोभिचलाई लोनमा ल्याउँदा गरेको सम्झौताअनुसार क्लबले उनलाई जम्मा ५.३ मिलियन पाउण्डमा अनुबन्धन गर्न पाउने प्रावधान छ ।

फ्रान्कफर्टले बेन्फिकाबाट उनलाई खरिद गरेर अन्य क्लबलाई बेच्न चाहे मोटो रकम फाइदा गर्न सक्ने देखिन्छ । युरोपका ठूला क्लबले उनलाई पछिल्लो समय पछ्याइरहेका छन् । रियल र बार्सिलोनाले भने एक कदम अगाडी बढ्दै उनलाई क्लबमा ल्याउन तयारी नै सुरु गरिसकेका छन् । २१ वर्षीय जोभिचको बजार मूल्य ५० मिलियन पाउण्डसम्म रहने बुझिएको छ ।

बार्सिलोनाले युरोपा लिगमा इन्टर मिलान र फ्रान्कफर्टको खेल हेर्न एरिक अबिडाल, पप सेगुरा र रामोस प्लेन्सलाई इटाली पठाएको थियो । उक्त खेलमा जोभिचले राम्रो प्रदर्शन गर्दै निर्णायक गोल गरेपछि बार्सिलोनाले प्रस्ताव राख्ने तयारी गरेको छ । यता रियल म्याड्रिडका व्यवस्थापक जोसे एन्जल स्यान्चेजले जोभिचका एजेन्टसँग प्रारम्भिक चरणको कुराकानी अगाडी बढाइसकेका छन् ।

विश्वकपअघि सर्बियाका लागि एकपटक मात्र खेलेका जोभिच विश्वकप खेल्ने अन्तिम टोलीमा परेका थिए । उनले मार्चमा पहिलो पटक सुरुवाती रोजाइमा पनि खेले । उक्त खेलमा जर्मनीविरुद्ध उनले गोल पनि गरे । सर्बियाका प्रशिक्षक म्लाडेन क्रास्टिचका अनुसार जोभिचले स्पेनिस क्लबहरुमा लुइस सुआरेज र करीम बेन्जेमाको स्थान लिन सक्छन् ।