एजेन्सी – यूईएफए च्याम्पियन्स लिग अन्तर्गत क्वाटरफाइनलको पहिलो लेगमा बुधबार इंग्लिस क्लब म्यानचेस्टर युनाइटेडले क्याटलान क्लब बार्सिलोनाको आतिथ्यता गर्दैछ ।

युनाइटेडको घरेलु मैदान ओल्ड ट्राफर्डमा हुने खेलको पूर्वसन्ध्यामा इंग्लिस क्लबका डिफेन्डर क्रिस स्मलिङले बार्सिलोनाका कप्तान लिओनेल मेसीलाई चुनौती दिएका छन् । पाँच पटकका ब्यालोन डी ओर उपाधि विजेता मेसीले जारि सिजन ४० खेल खेल्दै ४३ गोल गरिसकेका छन् ।

स्पेनिस ला लिगामा बलियो स्थानमा रहेको बार्सिलोनाले लिग उपाधि लगभग पक्का गरिसकेको छ । स्पेनिस कोपा डेल रेको फाइनलमा बार्सिलोनाले भ्यालेन्सियाको सामना गर्दैछ । च्याम्पियन्स लिग पनि जितेको खण्डमा बार्सिलोनाले उपाधिमा ह्याट्रिक गर्ने सम्भावना रहनेछ । त्यसका लागि बार्सिलोनाले क्वाटरफाइनलमा म्यानचेस्टर युनाइटेडलाई पाखा लगाउनु पर्नेछ ।

बार्सिलोना र मेसीले यसअघि पनि म्यानचेस्टर युनाइटेडसँग च्याम्पियन्स लिगको नकआउट चरणमा खेलिसकेका छन् । सन् २०११ मा वेम्बलीमा भएको फाइनलमा लिओनेल मेसीले गोल गरेपछि बार्सिलोनाले युनाइटेडलाई हराउँदै उपाधि जितेको थियो । त्यसयता युनाइटेडले केहि समय च्याम्पियन्स लिगमा छनोट हुन सकेको थिएन । यस सिजन भने युनाइटेडले युभेन्टस र पीएसजीजस्ता बलिया टोलीको सामना गरिसकेको छ ।

टोलीका डिफेन्डर क्रिस स्मलिङले पछिल्ला खेलमा किलियन एमबाप्पे र क्रिस्टियानो रोनाल्डोको सामना गरिसकेको कारण मेसीलाई रोक्न पनि तयार रहेको बताए । ‘ मैले यसलाई राम्रो अवसरको रुपमा लिएको छु । हामीले यस सिजन रोनाल्डो र एमबाप्पेको सामना गरेका छौं । हामी राम्रा टोली र खेलाडीको सामना गर्न सधैं तयार नै छौं । मेसी उत्कृष्ट खेलाडी हुन् र हामी उनको सामना गर्न तत्पर छौं ,’ उनले भने ।