एजेन्सी – यूईएफए च्याम्पियन्स लिग फुटबलको क्वाटरफाइनलको पहिलो लेगमा आज राति इंग्लिस क्लब म्यानचेस्टर युनाइटेडले क्याटलान क्लब बार्सिलोनाको आतिथ्यता गर्दैछ ।

खेल म्यानचेस्टर युनाइटेडको मैदान ओल्ड ट्राफोर्डमा आज राति १२ः४५ बजेपछि सुरु हुनेछ । घरेलु टोली युनाइटेड बार्सिलोनालाई पराजित गर्दै सेमिफाइनल पुग्ने सम्भावनालाई बलियो बनाउने योजनामा मैदान उत्रनेछ । घरेलु मैदानमा युनाइटेडले बार्सिलोनासँग हारेको इतिहास छैन । आफ्नो मैदानमा युनाइटेडले चार खेल खेल्दा समान दुई जित र बराबरीको नतिजा निकालेको छ ।

युनाइटेड यही लयलाई निरन्तरता दिने लक्ष्यमा मैदान उत्रनेछ । तर, युनाइटेडले च्याम्पियन्स लिगको नकआउटको पछिल्ला ११ खेलमा २ मा मात्र सफलता हात पारेको छ । त्यसमा दुई जित ३ बराबरी र ६ हार समावेश छ । सन् २०११/१२ को सिजनको सेमिफाइनलमा चेल्सी बाहिरिएसँगै पछिल्ला १० खेलमा इंग्लिस क्लब स्पेनिस टोलीसँग निराश हुँदै आएको छ । यसलाई तोड्न म्यानचेस्टर तयार छ ।

यो सिजन मध्यम सुरुवात गरेको म्यानचेस्टरले नयाँ प्रशिक्षकको रुपमा ओले गनर सोल्सजरलाई अनुबन्ध गरेपछि राम्रो प्रदर्शन गरिरहेको छ । युनाइटेडसँग स्टार खेलाडीहरु पल पोग्बा, मार्क्स रासफोर्ड, जेसे लिङ्गार्ड र एन्थोनी मार्सियलजस्त खेलाडीहरु रहेका छन् ।

यता, बार्सिलोना घरेलु मैदानमा युनाइटेडलाई स्तब्ध बनाउने लक्ष्यमा मैदान उत्रनेछ । बार्सिलोनासँग आधुनिक फुटबलका स्टार कप्तान लियोनेल मेस्सीको साथ रहेको छ । उनलाई लुइस स्वारेज, इभान राकिटिच, आर्थर, आर्टुरो भिडाल र जेरार्ड पिके जस्ता खेलाडीहरुले साथ दिनेछन् ।

लियोनेल मेस्सीले इंग्लिस टोलीविरुद्धको ३० खेलमा २२ गोल गर्न सफल भएका छन् । तर, मेस्सीले पछिल्लो समय क्वाटरफाइनल चरणमा भने गोल गर्न भने निकै संघर्ष गरिरहेका  छन् । दोस्रो लेग बार्सिलोनाको मैदानमा १७ अप्रिलमा हुनेछ ।