एजेन्सी – रियल म्याड्रिडका पूर्व डिफेन्डर पेपेले यूईएफए च्याम्पियन्स लिगमा लिभरपुलविरुद्ध खेलअघि आफ्नो टोली तयार रहेको बताएका छन् । पोर्चुगिज क्लब पोर्टोबाट खेलिरहेका पेपेले लिभरपुललाई हराउन आफ्नो क्लब सक्षम रहेको पनि बताए ।

रियल म्याड्रिडबाट बेसिक्टास पुगेका डिफेन्डर पेपे यसै सिजन जनवरीमा पोर्टो आएका थिए । उनले त्यसयता क्लबका लागि १२ खेल खेलिसकेका छन् । पोर्टोले च्याम्पियन्स लिगको क्वाटरफाइनल खेलमा मंगलबार लिभरपुलको सामना गर्दैछ । उक्त खेल कठिन हुने भएपनि पोर्टोले पूर्ण तयारी गरेको पेपेले बताएका छन् ।

‘ हामीले निकै कठिन चुनौतीको सामना गर्दैछौं । लिभरपुल निकै राम्रो टोली हो । उनीहरुको प्रशिक्षकको रणनीति निकै उत्कृष्ट रहने गर्छ,’ पेपेले थपे, ‘ हामीले आफ्नो खेल खेल्ने हो । यहाँसम्म आइपुग्दा गरेको प्रदर्शनलाई निरन्तरता दिने लक्ष्य राखेका छौं । सकारात्मक नतिजा हात पार्ने हिसाबले मैदानमा उत्रनेछौं ।’

उनले आफ्नो करिअरमा पोर्टो आउनुलाई पनि महत्त्वपूर्ण पाटो रहेको बताएका छन् । सन् २००४ देखि २००६ सम्म पोर्टोबाट खेलेका पेपे त्यसपछि रियल लागेका थिए । ‘ पोर्टो फर्कनु मेरो सपना थियो । म यहाँ सधैं खुसी छु । मैले यहाँ धेरै कुरा सिकेको छु र मेरो सफल खेल जीवनको श्रेय पोर्टोलाई नै जान्छ,’ उनले भने ।