एजेन्सी – यूईएफए च्याम्पियन्स लिग फुटबलको क्वाटरफाइनलको पहिलो लेगमा आज राति दुई इंग्लिस प्रतिद्धन्द्धी टोटेनहम हट्स्पर र म्यानचेस्टर सिटीबीच प्रतिस्पर्धा हुदैछ । खेल टोटेनहमको घरेलु मैदान टोटेनहम हट्स्पर स्टेडियम लन्डमा राति १२ः४५ बजेपछि सुरु हुनेछ ।

घरेलु मैदानमा हुने पहिलो लेगको नतिजा आफ्नो पक्षमा पार्दै टोटेनहम सेमिफाइनल प्रवेशलाई बलियो बनाउने योजनामा मैदान उत्रनेछ । मौरिसियो पोचिटिनोको टोटेनहमका इरिक डियर, सर्जि औरियर र इरिक लमेला सिटीविरुद्धको खेलमा मैदान उत्रने छैनन् । तर, टोटेनहमसँग ह्यारी केन, डेल अली, ह्युङ मिन सन र क्रिस्टियन इरिक्सनजस्ता खलोडीहरु मैदान उत्रनेछन् । उनीहरुलाई किरियन ट्रिपर, ड्यानी रोस र कप्तान ह्युगो लोरिसले साथ दिनेछन् ।

यता, म्यानचेस्टर सिटी टोटेनहमलाई उसकै मैदानमा टोटेनहमलाई पराजित गर्दै सेमिफाइल पुग्ने सम्भावनालाई जीवितै राख्ने लक्ष्यमा मैदान उत्रनेछ । सिटीले पहिलो रोजाईकै सर्जियो अग्विरोलाई टिममा राखेपनि उनले खेल्ने सम्भवाना न्युन छ । तर, सिटीसँग अन्य स्टार गाब्रियल जेसस, रहिम स्ट्रलिङ, बर्नाडो सिल्भा, केभिन डि ब्रुयनजस्ता स्तरीय खेलाडीहरुको साथ रहेको छ ।

सिटीले टोटेनहमविरुद्धको पछिल्ला चार खेलमा जित निकालेका कारण सोही जितलाई निरन्तरता दिने लक्ष्यमा हुनेछ । च्याम्पियन्स लिगमा सिटीले पछिल्ला ७ मध्ये ६ खेलमा जित हात पारेको छ । यता, टोटेनहम च्याम्पियन्स लिगको पछिल्ला ६ खेलमा अपराजित रहेको छ । त्यसैले यि दुई टोलीबीचको खेल रोचक र प्रतिस्पर्धात्मक हुने अनुमान गरिएको छ । दोस्रो लेग सिटीको मैदानमा १८ अप्रिलमा हुनेछ ।