एजेन्सी – युरोपेली च्याम्पियन्स लिग अन्तर्गत क्वाटरफाइनल चरणका खेलहरु मंगलबारदेखि सुरु हुँदैछन् । युरोपका शीर्ष ८ टोली क्लब फुटबलकै सबैभन्दा प्रतिष्ठित प्रतियोगिताको उपाधि जित्न आतुर देखिन्छन् ।

आधुनिक फुटबलका दुई शिर्षस्थ स्टारद्वय क्रिस्टियानो रोनाल्डो र लिओनेल मेसी पनि यस सिजन च्याम्पियन्स लिग उपाधिको होडमा कायम छन् । रोनाल्डोको टोली युभेन्टसले स्पेनिस टोली एटलेटिको म्याड्रिडलाई पराजित गर्दै अन्तिम ८ मा स्थान बनाएको थियो । त्यसक्रममा रोनाल्डोले ह्याट्रिक गर्दै समग्रमा ३-२ को जित दिलाए । यता बार्सिलोनाले लियोनलाई पराजित गर्दा पनि मेसी नै नायक सावित भए ।

च्याम्पियन्स लिगको इतिहासमा रोनाल्डो सर्वाधिक ५ पटक उपाधि जित्ने खेलाडी हुन् । गतवर्ष रियल म्याड्रिडले लगातार तेस्रो सिजन उपाधि जित्दा रोनाल्डोको भूमिका महत्त्वपूर्ण रहेको थियो । यता मेसी पनि च्याम्पियन्स लिग उपाधिमा रोनाल्डोलाई पछ्याइरहेका छन् । पछिल्लो पटक सन् २००८-०९ सिजनको च्याम्पियन्स लिग फाइनलमा यी दुई खेलाडी आमनेसामने भएका थिए । त्यसबेला रोनाल्डो म्यानचेस्टर युनाइटेडबाट खेल्थे ।

मेसीले उक्त खेलमा गोल गर्दै म्यानचेस्टर युनाइटेडलाई पराजित गरेका थिए । रोनाल्डो त्यसपछि रियल म्याड्रिड आएर ४ पटक च्याम्पियन्स लिग जितिसकेका छन् । उनले त्यसअघि युनाइटेडमै रहेर सो उपाधि जितेका थिए । यस सिजन पनि मेसी र रोनाल्डो च्याम्पियन्स लिगको उपाधि भिडन्तमा आमनेसामने हुने सम्भावना रहेको छ ।

क्वाटरफाइनल खेलमा युभेन्टसले बुधबार आयाक्सको सामना गर्दैछ । यद्यपी उक्त खेलका लागि रोनाल्डोको उपस्थितिबारे प्रश्न उठिरहेको छ । चोटका कारण उनले खेल्ने-नखेल्ने पक्का भएको छैन । बार्सिलोनाले सोहि समयमा म्यानचेस्टर युनाइटेडको सामना गर्नेछ ।