एजेन्सी – आधुनिक फुटबलमा लिओनेल मेसी र क्रिस्टियानो रोनाल्डोमध्य को उत्कृष्ट भन्ने वादविवाद सधैं कायम नै रहँदै आएको छ । यसैक्रममा स्पेनिस महारथी रियल म्याड्रिडका पुर्व मिडफिल्डर गुटीले क्रिस्टियानो रोनाल्डोभन्दा लियोनेल मेसी धेरै प्रतिभावान् रहेको बताएका छन् ।

मेस्सी र रोनाल्डोमा को उत्कृष्ट भनि सोधिएको प्रश्नमा गुटीले मेस्सीलाई छनोट गरेपनि रोनाल्डो ‘सेल्फ मेड’ र निकै नै महत्त्वाकांक्षी रहेको गुटीले बताए । ‘आधुनिक फुटबलमा मेसी र रोनाल्डोमा को उत्कृष्ट भन्ने बहस छ । उनीहरुले समान ५–५ बालोन डि’ओर अवार्डका साथै थुप्रै व्यक्तिगत अवार्ड जित्दै आ-आफ्नो क्लबलाई पनि उत्तिकै सफलता दिलाएका छन्,’ हाल टर्की महारथी बेसिक्टासका मुख्य प्रशिक्षक रहेका गुटीले भने, ‘मेरो लागि दुवै उत्कृष्ट । यो सत्य हो मैले मेस्सीलाई छाने । तर, म रोनालडोलाई पनि अत्यधिक महत्त्व दिन्छु मान्छु । उनी एक उत्कृष्ट खेलाडी हुन् ।’

उनले मेसी रोनाल्डो भन्दा धेरै प्रतिभावान् रहेपनि रोनाल्डो गोलकर्ता रहेको समेत बताएका छन् । ‘पक्कै पनि मेसीमा अधिक प्रतिभा छ । तर, रोनाल्डो गोलकर्ता हुन् । उनी एकदम महत्त्वाकांक्षी छन् । मेसीको समयमा रहेर पनि उनले ५ बालोन डि’ओर जितेका छन् । उनी क्लबका लागि महत्त्वपूर्ण खेलाडी हुन् । जुन उनले रियलमा देखाए,’ गुटीले भने, ‘रियलका सर्वाधिक गोलकर्तासमेत रहेका रोनाल्डोले क्लब छाडेदेखि नै रियल समस्यामा परिरहेको छ । ठूला खेलमा रोनाल्डोको अभाव महसुस क्लबले गरिरहेको छ । यो पनि सत्य हो ।’

रोनाल्डो यसै म्याड्रिड छाड्दै इटालियन महारथी युभेन्टस पुगेका थिए । रोनाल्डोको बर्हिगमनसँगै रियलले यो सिजन लिगमा निकै कमजोर प्रदर्शन गर्नुका साथै च्याम्पियन्स लिग र कोपा डेल रे बाट बाहिरी सकेका छन् । ला लिगामा पनि रियल १३ अंकले पछि रहेको छ । यता मेसीले यो सिजन सबै प्रतिस्पर्धामा ४२ गोल गर्दा रोनाल्डोले २४ को आँकडा पार गरेका छन् ।