काठमाडौं (हाम्रो खेलकुद) – एएफसी कपको समूह चरणको खेलमा बुधबार मनाङ मर्स्याङदी क्लबले ढाका अबहानीको सामना गर्दैछ । खेल सातदोबाटोस्थित एन्फा कम्प्लेक्समा दिउँसो ३ बजे सुरु हुनेछ ।

लिग च्याम्पियनको हैसियतले एएफसी कप खेल्न लागेको टोलीमा मनाङले अभिषेक रिजाल र देवेन्द्र तामाङलाई टोलीमा समेटेको छ । राष्ट्रिय टोलीका सदस्य देवेन्द्रले ए डिभिजन लिगमा च्यासलको कप्तानी गरेका थिए । त्यसपछि मोफसल फुटबलमा भने देवेन्द्र झापा-११ फुटबल क्लबको जर्सीमा देखिए । राष्ट्रिय टोलीका लागि कुवेतविरुद्ध मैत्रीपूर्ण खेलमा सेन्टर डिफेन्सको भूमिका निर्वाह गरेका देवेन्द्रको आगमनले मनाङको डिफेन्स बलियो हुनेछ । उनले सुरुवाती रोजाईमा नै खेल्ने सम्भावना रहेको छ ।

यता नेपाल पुलिस क्लबका विंगर अभिषेक रिजाल पनि मनाङ आएका छन् । यू-१९ राष्ट्रिय टोलीका सदस्य रहेका अभिषेकले पछिल्लो समय पुलिस छाडेर संकटाबाट पनि खेलेका थिए । एएफसी कपको लागि भने उनले मनाङको ज्रसी पहिरिने भएका छन् । उनीसँगै यू-१९ टोलीका गोलरक्षक दिप कार्की पनि मनाङ आएका छन् । अभिषेक र दिप भने पहिलो रोजाइमा पर्ने सम्भावना निकै कम छ । मिडफिल्डर शिव श्रेष्ठले पनि मनाङमा पुनरागमन गरेका छन् ।

खेलको पूर्वसन्ध्यामा बोल्दै मनाङका कप्तान विराज महर्जनले दुवै टोली एकै स्तरको रहेको बताएका छन् । ‘हामीले यसअघि पनि अबाहानीसँग खेलेका छौं । हामीले राम्रो प्रदर्शन गर्दै आएका छौं । राष्ट्रिय टोलीमा पनि अबाहानीका केहि खेलाडी रहेका थिए । दुवै टोली उस्तै स्तरको रहेको मेरो बुझाइ छ,’ उनले भने ।

लिग च्याम्पियन मनाङको तयारी पनि राम्रो रहेको कप्तान महर्जनले बताए । ‘हामीले छोटो समयमा भएपनि राम्रो तयारी गरेका छौं । राष्ट्रिय टोलीको ड्युटीपछि हामीले सँगै रहेर प्रशिक्षण गरेका छौं । लिगको टोलीमा केहि खेलाडी थपिएका छन् । अझै राम्रो प्रदर्शन हुने अपेक्षा छ,’ उनले भने ।

मनाङको समुहमा ढाकासँगै भारतको मिनेर्भा पन्जाब र चेन्नईयन फुटबल क्लब रहेका छन् । मनाङले पहिलो खेल ढाकासँग खेलेपछि भारतको दुई टोलीसँग उनीहरुकै मैदानमा खेल्नेछ ।

मनाङको पूर्ण टोली :
गोलरक्षक : विशाल श्रेष्ठ, दिप कार्की, अशोक बराल
डिफेन्डर : विराज महर्जन (कप्तान), कमल श्रेष्ठ, सुरज विक, देवेन्द्र तामाङ, प्रवेश दनुवार, अजिज शाहिद, मुहमद आसिफ
मिडफिल्डर : अन्जन विष्ट, सुजल श्रेष्ठ, विशाल राई, हेमन गुरुङ, प्रकाश बुढाथोकी, शिव श्रेष्ठ, अभिषेक रिजाल
फरवार्ड : आफिज ओलावाले ओलाडिपो, आडेलाजा सोमिडे, विमल राना