एजेन्सी – स्पेनिस ला लिगा अन्तर्गत मंगलबार अंक तालिकाको शीर्ष स्थानमा रहेको बार्सिलोना भिल्लारियलसँग अप्रत्याशित हारबाट जोगिएको छ । एक समय दुई गोलको अग्रता लिएको बार्सिलोना खेलदौरान दुई गोलले पछि परेपनि अन्तत: बराबरी गर्न सफल भयो । खेल ४-४ को बराबरीमा सकिएको थियो ।

बार्सिलोनाले पहिलो रोजाइका केही खेलाडीलाई विश्राम दिएपनि उत्कृष्ट सुरुवात पाएको थियो । ब्राजिलियन विंगर माल्कमले पहिलो हाफमा १ गोल र असिस्ट गर्दै बलियो स्थितिमा पुर्याए । १२ औं  मिनेटमा फिलिपे कोउटिन्होलाई असिस्ट दिएका माल्कमले १६ औं मिनेटमा गोल गर्दै अग्रता दोब्बर पारेका थिए ।

तर भिल्लारियलले उत्कृष्ट पुनरागमन गर्दै खेेलमा फर्कन सफल भयो । नियमित डिफेन्डर जेरार्ड पिकेको अनुपस्थितिमा भिल्लारियलका फरवार्ड स्याम चुकेजे र टोको एकाम्बीले प्रभावशाली प्रदर्शन गरे । २३ औं मिनेटमा चुकेजेले गोल गर्दै खेलमा भिल्लारियललाई फर्काउने प्रयास गरे ।

दोस्रो हाफको सुरुवातमै एकाम्बीले उत्कृष्ट गोल गर्दै खेल बराबरीमा ल्याए ‌। त्यसको १२ मिनेटपछि मिडफिल्डर भिसेन्ट इबोर्राले घरेलु टोलीलाई अग्रता दिलाए । कार्लोस बाकाले सान्टि काजोर्लाको पासमा ८० औं  मिनेटमा गोल गर्दै भिल्लारियललाई जितको संघारमा पुर्याए । तर खेल सकिन ४ मिनेट बाँकी रहँदा डिफेन्डर गोन्जालेजले रातो कार्ड पाएपछि बार्सिलोनाले खेलमा फर्कने अवसर पायो ।

नियमित समयको अन्तिम मिनेटमा वैकल्पिक खेलाडीका रुपमा मैदान प्रवेश गरेका लिओनेल मेसीले फ्रिकिकमा गोल गर्दै खेलमा बार्सिलोनाको सम्भावना कायम राखे । त्यसको तीन मिनेटमा लुइस सुआरेजले झन्डै २० यार्ड टाढाबाट गरेको प्रहार गोलमा परिणत भएपछि खेल बराबरीमा पुगेको थियो ।

लिगको अंक तालिकामा बार्सिलोना ३० खेलमा ७० अंकसहित शीर्ष स्थानमा कायम छ । दोस्रो स्थानमा रहेको एटलेटिको म्याड्रिडको ३० खेलमा ६२ अंक रहेको छ । तेस्रो स्थानको रियलले २९ खेलमा ५७ अंक जोडेको छ ।