एजेन्सी – घरेलु मैदानमा भएको खेलमा लिभरपुलले टोटेनह्यामलाई २-१ ले पराजित गर्दै इङ्लिस प्रिमियर लिगको शिर्षस्थानमा उक्लिएको छ । अन्तिम समयको गोलसँगै उपाधी दौड थप रोमाञ्चक भएको हो ।

सुरुआतबाट राम्रो लयमा देखिएको लिभरपुलले १६ औं मिनेटमा रोबर्टो फर्मिनोको हेडर गोलमा अग्रता लियो । एन्डी रोबर्टसनको क्रसलाई सदुपयोग गर्दै फर्मिनोले घरेलु दर्शकसामु लिभरपुललाई अग्रता दिलाए ।

पहिलो हाफमा लिभरपुलले राम्रो पकड राखेपनि दोस्रो हाफमा भने स्पर्सले सुधारिएको प्रदर्शन गर्यो । ७० औं मिनेटमा लुकास मौराले भ्रमणकारी टोलीलाई बराबरी गोल दिलाए । ह्यारी केनले फ्रि किक मार्फत सुरुआत गरेको मुभमा क्रिस्टियन एरिक्ससनको असिस्टमा मौराले बरबारी गोल गरे ।

म्यानचेस्टर सिटीसँग उपाधी दौडमा रहन जित्न पर्ने दबाबमा रहेको लिभरपुलले गोल गर्ने प्रयासहरु गरेपनि सफल हुन सकेन । तर ९० औं मिनेटको कर्नर लिभरपुलका लागि भाग्यशाली सावित भयो । आर्नोल्डको क्रसमा सलाहको हेडरलाई स्पर्सको गोलरक्षक ह्युगो लोरिसले बचाउँदा डिफेन्डर टोबी एल्डरवेयरको खुट्टामा लाग्दै आत्मघाती गोल भएपछि लिभरपुलले जित हासिल गर्यो।

जितसँगै ३२ खेलमा ७९ अंक रहेको लिभरपुल शिर्षस्थानमा उक्लिएको हो । सिटीको भने ३१ खेलमा ७७ अंक छ । त्यस्तै यसअघि आजकै खेलमा कार्डिफ सिटीको घरेलु मैदानमा चेल्सी १-० बाट फर्किदै २-१ को जित हासिल गर्यो । चेल्सीको जितमा एचपेलिक्वेटा र लफ्टक चीकले समान १ गोल गरे ।