एजेन्सी – अर्जेन्टिनाका प्रशिक्षक लिओनेल स्कालोनीले अर्जेन्टिनी राष्ट्रिय टोलीका कप्तान लिओनेल मेसीले कोपा अमेरिकामा सहभागिता जनाउनेमा ढुक्क रहेको बताएका छन् ।

आगामी जुन महिनामा हुने कोपा अमेरिकामा अर्जेन्टिना २६ वर्ष लामो उपाधि खडेरी तोड्ने योजनामा छ । सन् १९९३ यता अर्जेन्टिनाले कोपा अमेरिका उपाधि जित्न सकेको छैन । रुसमा भएको २०१८ को फिफा विश्वकपपछि गत सातामात्र राष्ट्रिय टोलीमा पुनरागमन गरेका मेसीको लागि उक्त खेल सुखद भने रहेन । भेनेजुएलासँग ३-१ ले पराजित भएको खेलमा मेसीले सामान्य चोट पनि बोकेका थिए ।

प्रशिक्षक स्कालोनीले कोपा अमेरिकाका लागि मेसी उपलब्ध रहने बताए । ‘ लिओले कोपा अमेरिका खेल्छन् । उनले खेल्नु पनि पर्छ । उनले पछिल्लो खेलमा पनि यहाँ रहँदा निकै म्हिनेट गरेका थिए,’ उनले थपे, ‘ भेनेजुएलाविरुद्ध खेलपछि पनि हामीले खेलबारे छलफल गर्यौं । हामीले आउने खेलबारे धेरै सोचेका छैनौं । हामी टोलीलाई अझ राम्रो बनाउने लक्ष्यसाथ अगाडी बढ्नेछौं ।’

स्कालोनीले कोपा अमेरिकाका लागि टोली मेसीमा नै निर्भर नहुने पनि बताए । ‘ हामीले मेसीमा मात्र निर्भर नहुने गरि टोली निर्माण गर्नुपर्छ । मेसी उत्कृष्ट खेलाडी हुन् तर टोलीले उनीबिना पनि खेल्न सक्नुपर्छ । उनले हामीलाई जितसम्म पुर्याउँछन् भन्नेमा दुइमत छैन,’ स्कालोनीले भने ।

कोपा अमेरिका जुन १४ देखि ब्राजिलमा सुरु हुँदैछ । १२ राष्ट्रको सहभागिता रहने प्रतियोगिताको समूह बी मा अर्जेन्टिनासँगै कोलोम्बिया, कतार र पाराग्वे रहेका छन् । अर्जेन्टिना प्रतियोगिताको पछिल्ला ५ मध्य ४ संस्करणमा फाइनलमा पराजित भएको छ ।