एजेन्सी – फरवार्ड अल्भेरो मोराटाले दुई गोल गरेपछि युरो छनोटमा स्पेनले माल्टामाथि २–० को सहज जित निकालेको छ ।

माल्टाको मैदानमा मंगलबार राति भएको खेलमा मोराटाले पहिलो र दोस्रो हाफमा समान १–१ गोल गरे । मोराटा सन् २०१७ नोभेम्वर पछि टिमको लागि गोल गर्न सफल भएका हुन् । माल्टालाई खेलको सुरुवातदेखि नै खेलमा दवावमा राखेको स्पेनले खेलको ३१औं मिनेटमा गोलको खाता खोलेको थियो । उनले मारियो हरमोसोको पासमा गोल गरेका थिए ।

दोस्रो हाफमा पनि स्पेनले खेलमा दवाव राखेपनि गोलको लागि निकै संघर्ष गर्नुपरेको थियो । लगातारको आक्रमण विफल भएपनि अन्ततः ७३औं मिनेटमा गोलको लागि सफल भएको थियो । यसपटक पनि मोराटाले जेसस नाभासको पासमा गोल गर्दै स्पेनलाई २–० को सहज जित दिलाए ।
यस जितसँगै स्पेन समुह ‘एफ’ मा दुई जितसँगै ६ अंक जोडेर शीर्षस्थानमा रहेको छ । माल्टा ३ अंकसहित चौथो स्थानमा छ ।

यही समुहको अर्काे खेलमा रोमानियाले फारोइ आइल्यान्डलाई ४–१ को फराकिलो गोल अन्तरले पराजित गरेको छ । रोमानियाको जितमा क्लाडिउ केशेरुले दुई तथा, सिप्रियन लोन डिक र जर्ज पुकासले गोल गरे । पराजित टिमका भिल्जोरमरले एक गोल फर्काए । जितसँगै रोमानिया ३ अंक जोडेर तेस्रो स्थानमा उक्लिएको छ । आइल्यान्ड अंकविहीन हुदै पुछारमा छ ।

समूहको अर्काे खेलमा स्वीडेन र नर्वेले ३–३ गोलको बराबरी खेल्दै अंक बाँडे । नर्वेका मार्स जोनसेन, जोसुवा किङ र ओला कामराले गोल गरे । स्वीडेनका भिक्टर क्लेसन र रोविन क्वासिनले गोल गर्दा एक गोल उपहार पाएको थियो । स्वीडेन ४ अंकसहित दोस्रो तथा नर्वे १ अंकसहित पाँचौ स्थानमा छ ।