काठमाडौं – रुपन्देही–११ लाई टाइब्रेकरमा हराउँदै त्रिभुवन आर्मी क्लब नेपालगन्ज रंगशालामा जारी यति सिमेन्ट नेपालगन्ज गोल्डकप फुटबलको सेमिफाइनलमा पुगेको छ । गोलकिपर गंगाराम देउजाले दुईवटा पेनाल्टी जोगाएपछि ४–२ ले विजयी हुँदै आर्मी अन्तिम चारमा पुगेको हो ।

विपक्षीका दुई पेनाल्टी रोकेका म्यान अफ दी म्याच गंगारामले टाइब्रेकरमा आफैले गोल पनि गरे । उनले रुपन्देहीका पुकार गहतराजको पहिलो र कालु थापाको अन्तिम पेनाल्टी रोकेका थिए । निर्धारित समय १–१ को बराबरीमा टुंगिएपछि खेल टाइब्रेकरमा गएको थियो । खेलको १८ औं मिनेटमा सुदीप श्रेष्ठको गोलबाट आर्मीले अग्रता बनाएको थियो । ३५ औं मिनेटमा रितेश मल्लले गोल गरेपछि पहिलो हाफमै खेल १–१ को बराबरीमा पुगेको थियो । दोस्रो हाफमा कुनै टोलीले गोल थप्न सकेन र खेल टाइब्रेकरमा धकेलियो । आर्मीले अब वैशाख २० गते सुदूरपश्चिम–११ सँग सेमिफाइनल खेल्नेछ । पोखरामा शनिबार आर्मी मनकामना केबुलकार पोखरा कपको फाइनलमा लक्ष्मी हुन्डाई मनाङ मस्र्याङ्दीसँग ५–० ले पराजित भएको थियो । रुपन्देहीका प्रशिक्षक दयाराम सापकोटाले आपसी तालमेल नहुँदा हार बेहार्नुपरेको बताए । आर्मीका प्रशिक्षक डाइमोज धिमालले खेलाडी नयाँ भएकाले अग्रता जोगाउन नसकेको बताए । उनले ‘ सिनियर खेलाडी घाइते छन् । अनुभवको कमीले कठिन भयो ।’ प्रतियोगितामा शनिबार ए डिभिजन क्लब सरस्वती क्लब र वेस्ट काठमाडौं एफसीबीच प्रतिस्पर्धा हुनेछ ।