एजेन्सी – युरो छनोटको खेलमा जर्मनीले नेदरल्यान्डमाथि रोमाञ्चक जित निकालेको छ । आइतबार राति भएको प्रतिस्पर्धात्मक खेलमा जर्मनीले नेदरल्यान्डमाथि ३–२ को रोमाञ्चक जित निकालेको हो ।

नेदरल्यान्डको घरेलु मैदानमा योहान क्रुफ एरिना आम्सटरडमा भएको खेलमा जर्मनीलाई जिताउन लिरोए साने, सर्जि जिनाब्री र निको स्कुल्जले गोल गरे । घरेलु टोलीका म्याथिज डि लिज र मेम्फिस डिपेले गोल गरे ।

निकै नै रोमाञ्चक बनेको खेलमा जर्मनीले पहिलो हाफमा २–० को अग्रता बनाएको थियो । १५औं मिनेटमा लिरोए सानेले निको स्कुल्जको पासमा गोल गर्दै पाहुना टोलीलाई अग्रता दिलाएका थिए । ३४औं मिनेटमा सर्जि जिनाब्रीले एन्टेनियो रुडिगरको पासमा गोल गरेपछि घरेलु टोली २–० ले पछि परेको थियो ।

तर, दोस्रो हाफमा घरेलु टोलीले उत्कृष्ट पुनरागमन गर्दै खेललाई बराबरीमा ल्याएका थिए । म्याथिजले म्याम्फिस डिपेको पासमा गोल गरेपछि खेल २–१ को अवस्थामा पुगेको थियो । ६३औं मिनेटमा जर्जिन्हो विज्नल्डमको पासमा म्याम्फिस डिपेले गोल गरेपछि खेल २–२ गोलको बराबरीमा पुगेको थियो । बराबरीतर्फ धकेलिएको खेलको अन्तिम समयमा निको स्कुल्जले गोल गरेपछि जर्मनीले खेल ३–२ ले आफ्नो पक्षमा पा¥यो ।

जितसँगै जर्मनीले समूह ‘सी’ मा ३ अंक जोड्दै दोस्रो स्थानमा उक्लिएको छ । दुई खेलबाट ३ अंक जोडेको नेदरल्यान्ड तेस्रो स्थानमा रहेको छ ।

यही समूहको अर्काे खेलमा नर्दन आयरल्यान्डले बेलारुसलाई २–१ ले पराजित गर्दै शीर्ष स्थानमा यथावत रह्यो । नर्दन आयरल्यान्डको जितमा जोनी इभान्स र जोस माजेनिसले गोल गरे । बेलारुसका इगरले एक गोल फर्काए ।

जितसँगै नर्दन आयरल्यान्डले अपराजित रहँदै ६ अंक जोड्यो । बेलारुसले जित निकाल्न सकेको छैन ।