एजेन्सी – कप्तान सर्जियो रामोसले पेनाल्टीमा गोल गरेपछि युरो छनोटअन्तर्गत समूह ‘एफ’ को खेलमा शनिबार स्पेनले नर्वेलाई २-१ ले पराजित गरेको छ ।

खेलको १६ औं मिनेटमा रोड्रीगो मोरेनोले स्पेनलाई अग्रता दिलाएका थिए । तर ६५ औं मिनेटमा नर्वेका लागि जोशुआ किङ्गले पेनाल्टीमा गोल फर्काए । त्यसको ५ मिनेटमै स्पेनले पनि पेनाल्टीको अवसर प्राप्त गर्यो ।

गोलरक्षक रुने जार्सटेनले अल्भारो मोराटालाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । कप्तान रामोसले पनेन्का पेनाल्टी प्रहार गर्दै जारि सिजनको १६ औं गोल प्रहार गरे । रामोसले यसै सिजन मात्र १० गोल पेनाल्टीमा गरेका छन् । उनले आफ्नो करिअरमा ९० गोल पुर्याएका छन् ।

सन् १९६४, २००८ र २०१२ मा युरो कप जितेको स्पेनले खेल अवधिभर बल पोसेसनमा पकड बनाएपनि गोल गर्न भने सकेन । चेल्सीबाट एटलेटिको म्याड्रिड पुगेका फरवार्ड अल्भारो मोराटाले गोल गर्ने थुप्रै अवसर खेर फालेका थिए ।

समूहकै अन्य खेलमा माल्टाले फारो आईल्याण्डलाई २-१ तथा स्विडेनले रोमानियालाई २-१ ले नै पराजित गरे । तीनै विजयी टोली ३-३ अंक लिएर समूहको शीर्ष स्थानमा छन् ।