विराटनगर (हाम्रो खेलकुद) – पाँचौ महिला साफ च्याम्पियनसिपको फाइनलमा नेपाल र भारत खेलिरहेका छन् । पहिलो हाफको समाप्तिमा खेल १-१ को बराबरीमा रहेको छ ।

भारतले खेलमा अग्रता लिएपनि सावित्रा भण्डारीको गोलसँगै नेपाल उपाधि होडमा फर्किएको हो । विराटनगरस्थित सहिद मैदानमा जारी खेलको २६औं मिनेटमा डालिमा छिब्बरले करिव ३५ यार्डबाट फ्रिकिकमा सुन्दर गोल गरेपछि नेपाल खेलमा पछि परेको थियो । हीरा कुमारी भुजेले विपक्षी खेलाडीलाई लडाएपछि प्राप्त फ्रिकिकलाई डालिमाले सोझै गोलमा परिणत गरेकी हुन् ।

तर, ३३औं मिनेटमा डिफेन्डर पुनम जर्घा मगरको लामो पासमा सावित्रा भण्डारीले बराबरी गोल फर्काइन् । उनले फ्लिक हेडर गर्दै गोलरक्षक अदिति चौहानले रोक्न सकिनन् । पहिलो हाफको अन्तिम मिनेटमा सावित्राले अग्रता दिलाउने सुन्दर अवसर खेर फालिन् । उनलको सुरुवाती प्रहार अदितिले रोकेपनि दोस्रो प्रहारले भने पोस्टको दिशा लिन सकेन ।

घरेलु मैदानमा दर्शकको राम्रो साथ पाएको नेपालले खेलमा भारतलाई दवावमा राखेको थियो । खेलको सातौं मिनेटमा अनिता बस्नेतको कर्नरमा बक्सभित्र सावित्रा भण्डारी र दीपा राईले प्रयास गरेपनि सफल हुन सकेन । ११औं मिनेटमा रेनुका नगरकोटेको पासमा सावित्रा अफसाइड भइन् । १३औं मिनेटमा सावित्राको पासमा मन्जली कुमारी योन्जनको प्रहार पोस्टबाट थोरै बाहिरियो ।

१९औं मिनेटमा सावित्राले कप्तान निरु थापाको पासमा एक डिफेन्डरलाई बिट गर्दै गरेको प्रहारले पोस्टको दिशा लिन सकेन । २३औं मिनेटमा सावित्राले अनिताको अर्काे पासलाई सदुपयोग गर्न सकिनन् । १६औं मिनेटमा भारतकी सन्जुको बक्सबाहिरको प्रहार गोलरक्षक एन्जिला तुम्बापो सुब्बाले बचाइन् ।

दोस्रो हाफ केही बेरमा सुरु हुनेछ ।