विराटनगर (हाम्रो खेलकुद) – पाँचौ साफ महिला च्याम्पियनसिपको फाइनलमा नेपाल र भारत भिड्दैछन् । उपाधि भिडन्तका लागि नेपालले सेमिफाइनलमा उत्रेको टोली नै उतार्ने भएको छ ।

नेपालले सेमिफाइनलमा श्रीलंकालाई ४-० ले पराजित गर्दै फाइनलमा स्थान बनाएको थियो । त्यसअघि समूह चरणको अन्तिम खेलमा बंगलादेशविरुद्ध पनि नेपालले ३-० को जित दर्ता गर्दा सोहि टोली उतारेको थियो । पहिलो खेलमा अमृता जैशीलाई सेन्टर डिफेन्समा उतारेको नेपालले दोस्रो खेलदेखि भने पुनम जर्घामगरलाई निरन्तरता दिँदै आएको छ ।

नेपाली टोलीको गोलरक्षकमा एन्जिला तुम्बापो सुब्बाले निरन्तरता पाउनेछिन् । डिफेन्समा गीता राना र पुनम जर्घामगरसँगै हिराकुमारी भुजेल र मनमाया लिम्बु रहनेछन् । मिडफिल्डमा दिपा राई र रेनुका नगरकोटेको जोडीले खेल्नेछ । विंगरद्वय अनिता बस्नेत र मन्जलीकुमारी योन्जनले फरवार्ड सावित्रा भण्डारी र कप्तान निरु थापालाई सहयोग गर्नेछन् ।

नेपालले जारी प्रतियोगितामा ३ खेलमा १० गोल गर्दै सबै खेलमा क्लिन सिट राख्न सफल भएको छ । नेपालको लागि सावित्रा भण्डारीले सर्वाधिक ३, मन्जलीकुमारी योन्जनले २ तथा निरु थापा, रेखा पौडेल, अनिता बस्नेत र पुनम जर्घामगरले १-१ गोल गरेका छन् । नेपालले बंगलादेशविरुद्ध एक गोल आत्मघाती गोलको रुपमा उपहार पाएको थियो ।