काठमाडौं (हाम्रो खेलकुद) – नेपाली राष्ट्रिय फुटबल टोलीले बिहीबार कुवेतविरुद्ध मैत्रीपूर्ण खेल खेल्दैछ । नवनियुक्त प्रशिक्षक योहान कालीनले जिम्मेवारी लिएपछिको पहिलो खेल नेपाली समयानुसार ९:१५ बजे सुरु हुनेछ ।

प्रशिक्षक कालीनले कुवेतविरुद्ध खेलमा डिफेन्डर अजित भण्डारीलाई पहिलो रोजाइमा उतारेका छन् । उनको राष्ट्रिय टोलीबाट यो पहिलो खेल हो । उमेर समूहका कुनै प्रतियोगिता नखेलेका अजित राष्ट्रिय टोलीमा स्थान बनाएको दोस्रो प्रयासमा डेब्यु गर्न सफल भएका छन् । अजित यसअघि सन् २०१५ मा पुनेमा भएको भारतविरुद्धको मैत्रीपूर्ण खेलमा टोलीमा परेपनि मैदानमा उत्रन भने पाएका थिएनन् ।

अजितसँगै सेन्टर डिफेन्समा देवेन्द्र तामाङ रहनेछन् । उनलाई कप्तान विराज महर्जन र रञ्‍जित धिमालले साथ दिनेछन् । गोलरक्षक किरण चेम्जोङले नै पोस्ट सम्हाल्नेछन् । मिडफिल्डमा विक्रम लामा र रोहित चन्दको जोडीले मध्यभागमा खेल्नेछन् । सुमन लामा र सुजल श्रेष्ठले विङ्गरको भूमिका निर्वाह गर्दै आक्रमणलाई सहयोग गर्नेछन् । आर्मीका फरवार्डद्वय भरत खवास र नवयुग श्रेष्ठले अग्रपंक्तिको जिम्मेवारी निभाउनेछन् ।

नेपाल विरुद्ध कुवेत :

किरण चेम्जोङ
रञ्‍जित धिमाल – देवेन्द्र तामाङ – अजित भण्डारी – विराज महर्जन (कप्तान)
सुजल श्रेष्ठ – विक्रम लामा – रोहित चन्द – सुमन लामा
भरत खवास
नवयुग श्रेष्ठ

वैकल्पिक खेलाडीहरु : विकेश कुथु, विशाल श्रेष्ठ, सुरज विक, रवि सिलवाल, सरोज दाहाल, सन्तोष तामाङ, विशाल राई, हेमन गुरुङ, रवि पासवान, टंक बस्नेत, आशिष लामा, रन्जन विष्ट र विमल राना