विराटनगर (हाम्रो खेलुकद) – पाँचौ संस्करणको साफ महिला च्याम्पियनसिपको उपाधिको लागि शुक्रबार नेपाल र भातरबीच प्रतिस्पर्धा हुदैछ ।

खेल विराटनगरस्थित सहिद रंगशालामा दिउसो ३ बजेपछि शुरु हुनेछ । विराटनगरमा बिहीबार आयोजित प्रि–म्याच पत्रकार सम्मेलनमा नेपाली टोलीका प्रशिक्षक हरि खड्काले दक्षिण एसियामा भारत बलियो भएपनि यसपटकको साफमा भारतको वर्चस्व तोड्दै उपाधि नेपालले जित्ने बताएका छन् ।

‘दक्षिण एसियामा भारत बलियो र स्थापित टोली हो । हामीले पनि फाइनलसम्मको यात्रा तय गरेका छौं । हामी पनि स्थापित हुने क्रममा छौं,’ प्रि–म्याच पत्रकार सम्मेलनमा प्रशिक्षक खड्काले भने, ‘हामीले भारतसँग यसअघि दुई खेल खेलेका छौं । जसमा एक जित र एक बराबरी छ । टिमको मनोवल उच्च रहेको छ । उनीहरुको विङ्समा केही राम्रो देखिएको छ । हामी उनीहरुलाई रोक्दै उपाधि जित्ने लक्ष्यमा हुनेछौं ।’

यस्तै प्रशिक्षक खड्काले टिम व्यालेन्स रहेकाले पनि अिल बढी मिहेनत गरेर खेले भारतलाई पराजित टिम उपाधि जित्न सक्षम रहेको बताए ।

‘ यसअघिका चार संस्करणमा नेपाल भारतसँगै पराजित छ । भारत अपराजित रहँदै चारै संस्करणको च्याम्पियन हो । हामी साफमा भारतको वर्चस्व तोड्न चहान्छौ,’ प्रशिक्षक खड्काले भने, ‘हामी फाइनलका लागि तयार छौं । मलाई लाग्छ, भोलि हाम्रो दिन हो । हामी टोटल फुटबल खेल्दै उपाधिका लागि प्रयास गर्नेछौं ।’

प्रशिक्षक खड्काले टिमको मुख्य हतियार फाइटिङ स्प्रिट रहेको र भारतसँगको डोमिनेटिङ नेचर हटेका कारण अलिकति बढी मिहेनत गरे उपाधि जित्न सकिने दावी गरे ।

सेमिफाइनलमा नेपालले श्रीलंकालाई ४–० ले पराजित गरेको थियो । नेपाल चौंथो पटक साफको फाइनलमा प्रवेश गरेको हो । भारतले बंगलादेशलाई ४–० गोल अन्तरले पराजित गर्दै नेपालसंगको भेट पक्का गरेको थियो ।

निरु थापा (कप्तान, नेपाल)
कोचले सिकाएको अनुसार खेल्नेछौं । ब्याक टु ब्याक भारतसँग राम्रो नतिजा आइरहँदा मनोवल उच्च छ । पहिले भारत भन्ने बित्तिकै एक किसिमको डर उत्पन्न हुने गर्दथ्यो । यसपटक टिम वर्कका कारण त्यो डर हटेको छ ।

मायामोल रक्की (प्रशिक्षक, भारत)
घरेलु टोलीसँगको फाइनल रोमाञ्चक हुने अपेक्षा गरेका छौं । नेपालले राम्रो खेल्दै बलियो टोली हो । उनीहरुलाई घरेलु मैदानको साथ रहेपनि हामी जित्नको लागि खेल्नेछौं । हरेक खेल नयाँ हुने । अघिल्ला दुई खेल भन्दा पनि हामीले भोलिको खेलको लागि सोचेको ।

आशालतादेवी (कप्तान, भारत)
हामी पाँचौ उपाधि जित्न आएको हौं । हामी त्यसको लागि प्रयास गर्नेछौं ।