6 years ago
March 19, 2019
सुबास हुमागाईं, काठमाडौं
नेपाली पुरुष राष्ट्रिय फुटबल टोलीमा कुवेतविरुद्धको मैत्रीपूर्ण खेलका लागि अधिकांश नयाँ अनुहार समेटिएका छन् । मैत्रीपूर्ण खेलका प्रशिक्षक योहान कालीनले सिधै २३ खेलाडीको अन्तिम टोली छनोट गरेका थिए । इन्डोनेसियाबाट रोहित चन्द पनि आएपछि २४ खेलाडी सम्मिलित राष्ट्रिय टोली कुवेत प्रस्थान गरेको छ ।
नेपालको राष्ट्रिय टोली र यू-२३ टोलीको खेल एकै समय भएपछि राष्ट्रिय टोलीमा रहँदै आएका केहि युवा खेलाडी यू-२३ टोलीमा व्यस्त छन् । प्रशिक्षक कालीनले यसकारण युवा खेलाडीलाई बाहिर राख्दै टोलीको घोषणा गरेका छन् । विमल घर्ति मगर, अनन्त तामाङ, अन्जन विष्ट, सुनील बल, दिनेश राजवंशी, तेज तामाङलगायत खेलाडीले यसअघि राष्ट्रिय टोलीको पहिलो रोजाइमा नै खेल्दै आएका छन् । कालीनसमक्ष अब नयाँ खेलाडीलाई उनीहरुको स्थानमा प्रयोग गर्नुपर्ने बाध्यता छ ।
अहिलेको राष्ट्रिय टोलीमा ९ जना खेलाडीले राष्ट्रिय टोलीबाट डेब्यु गर्न बाँकी रहेको छ । तीमध्य पनि ७ जना पहिलो पटक राष्ट्रिय टोलीमा पहिलो पटक परेका हुन् । डिफेन्डर अजित भण्डारी र गोलरक्षक विशाल श्रेष्ठ यसअघि नै राष्ट्रिय टोलीमा परेपनि डेब्यु गर्ने अवसर भने पाएका छैनन् । यसबाहेक डिफेन्डरहरु सुरज विक, रवी सिलवाल, सरोज दाहाल, मिडफिल्डरद्वय सन्तोष तामाङ र रवी पासवान तथा फरवार्डद्वय विमल राना र आशिष लामा पहिलो पटक टोलीमा परेका हुन् ।
प्रशिक्षक कालीनले आफूले मोफसलका दुई प्रतियोगितामा गरेको प्रदर्शनलाई हेरेर नयाँ खेलाडीलाई टोलीमा समेटेको बताए । मोफसलका प्रतियोगिताको स्तर उल्लेख्य नभएपनि खेलाडीलाई प्रशिक्षणमा हेरेपछि छनोटलाई लिएर उनी खुसी छन् । ‘पुरै टोली सँगै रहेर प्रशिक्षण गर्ने समय हामीले पाएनौं । हामीले पाएको समयको भरपुर उपयोग गरेका छौं । खेलाडीहरु एकअर्कासँग खेल्न सहज मान्न थालेका छन्,’ उनले भने ।
यसअघि दुई मैत्रीपूर्ण खेल खेल्ने भनिएपनि मलेसियाविरुद्ध खेल रद्द हुन पुगेको थियो । यसले आफ्नो योजनामा भने असर नपर्ने कालीन बताउँछन् । ‘ एक खेल मात्र नहुँदा हामीलाई फरक पर्दैन । हामी दिर्घकालिन योजना लिएर अगाडी बढेका छौं । यस्तो खेल पाउनु राम्रो हो । हामीले टोलीको स्तर नाप्ने अवसर पाएका छौं,’ उनले भने, ‘ अहिलेको लक्ष्य भनेको सकेसम्म धेरै खेलाडीको खेल हेर्न पाउनु हो । खेलाडीको स्तरबारे अहिले नै भन्न सक्ने अवस्था छैन । केहि राम्रा खेलाडी पाएको महसुस भएको छ । यस खेलपछि केहि निर्णय लिन सक्नेछौं ।’
यसअघि राष्ट्रिय टोलीमा रहेका अधिकांश खेलाडी यू-२३ टोलीमा व्यस्त छन् । त्यसैकारण पनि राष्ट्रिय टोलीमा धेरै नयाँ खेलाडी छन् । प्रशिक्षक कालीनले यसलाई नयाँ खेलाडीको परिक्षण गर्ने अवसरको रुपमा लिएका छन् । ‘ मैले अहिलेसम्म यू-२३ खेलाडीलाई हेर्न पाएको छैन । तर अहिलेको खेलाडीको प्रदर्शन हेरे पछि युवा टोलीका खेलाडी पनि सँगै हुँदा मलाई सहज हुन्छ । अहिलेको टोलीमा नयाँ प्रतिभा पनि छन् । यो अवसर सदुपयोग गर्ने उनीहरुलाई सहज हुनेछ । यसले भविष्यमा पनि टोलीमा पर्न प्रतिस्पर्धा बलियो हुने अपेक्षा गरेको छु,’ कालीनले भने ।
प्रशिक्षक कालीनले नेपालले पछिल्लो समय खेल्दै आएको ४-४-२ को रणनीतिमा केहि परिवर्तन गर्दै ४-४-१-१ मा टोलीलाई उतार्ने रणनीति बुनेका छन् । यस्तो अवस्थामा पहिलो रोजाइमा कम्तिमा एक खेलाडीले डेब्यु पाउने सम्भावना प्रबल छ । गोलरक्षकमा किरण चेम्जोङ नियमित नै रहनेछन् भने डिफेन्समा एक स्थान खालि रहने देखिन्छ । अनन्त तामाङ यू-२३ टोलीमा रहनु र आदित्य चौधरी घाइते हुनुले देवेन्द्र तामाङसँग सेन्टर डिफेन्समा अजित भण्डारीले मौका पाउन सक्छन् । यसबाहेक सुरज विक र रवी सिलवाल पनि मौकाको प्रतिक्षामा हुनेछन् ।
सुमन अर्याल र दिनेश राजवंशीको अनुपस्थितिमा नियमित कप्तान विराज महर्जन र रञ्जित धिमालले साइड डिफेन्स हेर्नेछन् । यद्यपी सरोज दाहालले पछिल्लो समय गरेको प्रदर्शनले उनको पनि सम्भावना बढाएको छ ।
मिडफिल्डको मध्यभागमा प्रतिस्पर्धा निकै तीव्र छ । विक्रम लामा चोटबाट फर्किएका छन् भने रोहित छन् पनि उपलब्ध छन् । विशाल राई र हेमन गुरुङ पनि यसै स्थानको लागि प्रतिस्पर्धामा छन् । डेब्यु गर्न बाँकी रहेका सन्तोष तामाङले वैकल्पिकको रुपमा स्थान बनाउन पनि मिहिनेत गर्नुपर्ने देखिन्छ ।
विङ्समा सुजल श्रेष्ठ र सुमन लामा राष्ट्रिय टोलीमा अनुभव बोकेका खेलाडी हुन् । टंक बस्नेत लामो समयपछि टोलीमा फर्केर आफ्नो स्थान सिद्ध पार्न चाहन्छन् भने रवी पासवान घरेलु प्रतियोगिताको लयलाई अन्तर्राष्ट्रिय जर्सीमा प्रस्तुत गर्ने अवसरको प्रतीक्षामा हुनेछन् ।
फरवार्डद्वय भरत खवास र नवयुग श्रेष्ठ आक्रमणका लागि निर्विकल्प पहिलो रोजाइमा छन् । तर प्रशिक्षक कालीनलाई रन्जन विष्टले फरवार्डपछि निभाउने भूमिकाले आकर्षित गर्न सक्छ । विमल राना र आशिष लामाको कडा मिहिनेत अहिले नै सफल हुने देखिएको छैन । यसका लागि यो अवसरमा अमित छाप बसाउने प्रयास यी दुई नवप्रवेशी खेलाडीको हुनेछ ।
कुवेत भ्रमणका लागि नेपाली टोली
गोलरक्षक : किरण चेम्जोङ, विकेश कुथु, विशाल श्रेष्ठ
डिफेन्डर : विराज महर्जन, देवेन्द्र तामाङ, अजित भण्डारी, रञ्जित धिमाल, सुरज विक, रवी सिलवाल, सरोज दाहाल
मिडफिल्डर : रोहित चन्द, विक्रम लामा, सन्तोष तामाङ, विशाल राई, हेमन गुरुङ, सुजल श्रेष्ठ, सुमन लामा, रवी पासवान, टंक बस्नेत
फरवार्ड : भरत खवास, नवयुग श्रेष्ठ, आशिष लामा, रन्जन विष्ट र विमल राना
खेल मार्च २२ मा नेपाली समयअनुसार रातको ९:१५ बजे । स्थान – अल शबाब स्पोटर्स रंगशाला
March 21, 2025
काठमाडौं (हाम्रो खेलकुद)- नेपालले सिंगापुरविरुद्धको अन्तर्राष्ट्रिय मैत्रीपूर्ण खेलमा अग्रता लिएको छ । सिंगापुरको नेसनल स्टेडियममा जारी खेलमा नेपालले जिलेस्पीजंग कार्कीको गोलमा अग्रता लिएको हो।उनले १२औं मिनेटमा गोल गरे । नेपालले सिंगापुरविरूद्धको औपचारिक खेलमा पहिलो पटक गोल गर्न सफल भएको हो। नेपालले एएफसी एसियन कप छनोट खेल्ने तयारीमा क्रममा मैत्रीपूर्ण खेल खेलको हो । अष्ट्रेलियन प्रशिक्षक […]
March 21, 2025
काठमाडौं (हाम्रो खेलकुद)- एएफसी एसियन कप छनोट खेल्ने तयारीमा रहेको नेपाली राष्ट्रिय फुटबल टोलीले आज सिंगापुरसँग अन्तर्राष्ट्रिय मैत्रीपूर्ण खेल खेल्दैछ। नेपाल र सिंगापुरबीचको खेल सिंगापुर नेसनल स्टेडियममा नेपाली समयअनुसार साँझ ६:१५ बजे सुरु हुनेछ। अष्ट्रेलियन प्रशिक्षक म्याट रोसकोलागि यो पहिलो खेल हुनेछ। यसअर्थ उनको लागि आजको खेल विशेष रहनेछ। आफ्नो पहिलो खेलमा सकारात्मक नतिजा निकाल्ने […]
March 21, 2025
काठमाडौं (हाम्रो खेलकुद) – नेपाली राष्ट्रिय महिला फुटबल टोलीकी फरवार्ड सावित्रा भण्डारी ‘साम्बा’ प्रधानमन्त्री राष्ट्रिय प्रतिभा पुरस्कार-२०८१ बाट पुरस्कृत भएकी छिन् । सरकारले विभिन्न क्षेत्रमा उल्लेखनीय योगदान पुर्याउने प्रतिभाशाली नागरिकलाई प्रदान गर्ने पुरस्कार अन्तर्गत विभिन्न विधाका १० जना पुरस्कृत गर्दा खेलकुदबाट साम्बा पुरस्कृत भएकी हुन् । राष्ट्रिय प्रजातन्त्र दिवस २०८१ का अवसरमा आज सैनिकमञ्च टुँडिखेलमा आयोजित […]