एजेन्सी – हामेस रोड्रिग्वेजको ह्याट्रिक मद्दतमा जर्मन च्याम्पियन बायर्न म्युनिखले मेन्जमाथि गोलको वर्षा गरेको छ ।

हामसेसको ह्याट्रिकसँगै घरेलु टोली बायर्नले मेन्जमाथि ६–० को फराकिलो जित निकालेको हो ।
बायर्नका रोबर्ट लेवान्डोस्की, किङ्सले कोमान र अलफोन्सो डेभिजले समान १ गोल गरे । एकपक्षीय खेलमा बायर्नले पहिलो र दोस्रो हाफमा समान ३ गोल गरे ।

खेलको तेस्रो मिनेटमै रोबर्ट लेवान्डोस्कीको गोलबाट बायर्नले खेलमा अग्रता बनाएको थियो । ३३औं मिनेटमा हामेसले गोल गर्दै अग्रता दोब्बर बनायो । ३९औं मिनेटमा किङ्सलेले गोल गरेपछि बायर्नले पहिलो हाफमा ३–० को आरामदायी अग्रता बनायो ।

दोस्रो हाफमा पनि बायर्नले गोल गर्ने क्रमलाई रोकेन । खेलको ५१औं मिनेटमा हामेसले गोल गर्दै खेललाई ४–० को अवस्थामा ल्याए । त्यसको ४ मिनेटपछि अर्थाथ ५५औं मिनेटमा हामेसले अर्काे गोल गर्दै ह्याट्रिक पुरा गरेपनि बायर्न ५–० ले अघि बढ्यो । ७२औं मिनेटमा अलफन्सोले गोल गर्दै बायर्नलाई ६–० को फराकिलो जित दिलाए ।

जितसँगै बायर्न पुनः बुन्डेस लिगाको शीर्षस्थानमा फर्किएको छ । बायर्नले दोस्रो स्थानको बोरुसिया डर्टमन्डलाई गोल अन्तरमा पछि पारेको हो । दुवै टोलीको समान खेलबाट ६० अंक रहेको छ । मेन्ज ३० अंकसहति १३औं स्थानमा छ ।